Səhiyyə Nazirliyinin Elmi-Tədqiqat Kardiologiya İnstitutunda növbəti iclas keçirilib. Görüşdə institutun direktoru, professor Gülnaz Dadaşova kollektivə fəaliyyətə yeni başlayan rezidentləri təqdim edib.

Azmedinfo.az xəbər verir ki, professor Gülnaz Dadaşova rezidentləri təbrik edərək onlara gələcək peşə fəaliyyətlərində uğurlar arzulayıb. O, gənc mütəxəssislərə elmi bilik və bacarıqlarını daim artırmağın, institutun formalaşmış dəyərlərinə sadiq qalmağın, pasiyentlərə yüksək məsuliyyət və vicdanla xidmət etməyin əhəmiyyətini diqqətə çatdırıb.

İclasda həmçinin institutun müxtəlif şöbələrində görülən işlər barədə məlumatlar təqdim olunub. Tibbi xidmətin keyfiyyətinin artırılması, pasiyent məmnuniyyətinin yüksəldilməsi və elmi-tədqiqat fəaliyyətinin daha da gücləndirilməsi istiqamətində görüləcək tədbirlər geniş müzakirə edilib.

Tədbirdə çıxış edən struktur rəhbərləri və həkim mütəxəssislər görülən işlər barədə hesabat verərək cari fəaliyyətin təkmilləşdirilməsi, yeni təşəbbüslərin reallaşdırılması və qarşıdakı məqsədlərin daha səmərəli icrası ilə bağlı təkliflərini səsləndiriblər.