Payız mövsümünün dəyişkən hava şəraiti bir sıra xroniki xəstəliklərin gedişinə mənfi təsir göstərə bilər. Xüsusilə qan təzyiqi, bronxial astma və şəkərli diabetdən əziyyət çəkən şəxslərin bu dövrdə daha diqqətli olmaları tövsiyə olunur.

Azmedinfo.az xəbər verir ki, TƏBİB-in tabeliyində fəaliyyət göstərən Bakı Baş Səhiyyə Mərkəzinin strukturuna daxil olan 7 nömrəli Şəhər Poliklinikasının həkim-terapevti Güney Nuruyevanın sözlərinə görə, fəsil dəyişmələri zamanı orqanizmdə immun sisteminin zəifləməsi müşahidə edilir. Bu isə mövsümi və respirator xəstəliklərin artmasına səbəb olur.

Həkimin bildirdiyinə görə, temperaturun kəskin enməsi, insanların daha çox qapalı məkanlarda toplaşması və immunitetin zəifləməsi qrip və digər virus infeksiyalarının yayılmasını sürətləndirir.

G.Nuruyeva qeyd edib ki, qripə hər il milyonlarla insan yoluxur və xəstəliyin ağır keçməsi çox zaman yanaşı xəstəliklər və zəif immunitetlə əlaqədardır.

Mütəxəssis profilaktik tədbirlərə xüsusi diqqət yetirilməsini tövsiyə edib:

şəxsi gigiyenaya riayət etmək, əlləri mütəmadi sabunla yumaq;

maska və qoruyucu vasitələrdən istifadə etmək;

xəstə şəxslərlə təmasdan çəkinmək;

immuniteti gücləndirmək üçün mövsümi meyvə-tərəvəzlər və vitaminlərlə zəngin qidalar qəbul etmək;

hava şəraitinə uyğun geyim seçmək.

Həkim əlavə edib ki, insanlar çox vaxt soyuqdəymə ilə qripi eyniləşdirir, halbuki bu iki hal arasında fərq var. Soyuqdəymə adətən yüngül keçir, qrip isə virus mənşəli olduğundan daha ağır fəsadlara yol aça bilər.

Güney Nuruyeva vətəndaşlara xəbərdarlıq edib ki, xəstəliyin ilk simptomları hiss olunduğu anda mütəxəssisə müraciət etmək, ev şəraitində özbaşına müalicə və antibiotik istifadəsindən qəti şəkildə uzaq durmaq lazımdır. Əks halda, bu cür yanaşma sağlamlığa ciddi zərər vura bilər.

Bakı Baş Səhiyyə Mərkəzi