Onurğa sütunu ilə bağlı problemlər, xüsusilə də qamətin əyilməsi (sutulost) bir çox xroniki xəstəliklərin, o cümlədən yuxusuzluqdan tutmuş ürək-damar patologiyalarına qədər bir çox narahatlığın əsas səbəblərindən biridir.

Azmedinfo.az xəbər verir ki, bu barədə “Vechernyaya Moskva” qəzetinə nevropatoloq və manual terapevt Aleksandr Evdokimov məlumat verib.

Həkimin sözlərinə görə, əzələlərin həddindən artıq gərginləşməsi bədənin müəyyən hissələrində blokların yaranmasına səbəb olur və bu bloklar reflektor şəkildə daxili orqanların fəaliyyətinə mənfi təsir göstərir. Xüsusilə boyun hissəsinin əyriliyi və ya yer dəyişməsi təhlükəlidir, çünki bu zaman beyinə qan axını azalır, nəticədə bir sıra ciddi pozğunluqlar meydana gəlir.

Həkim qeyd edib ki, bu gün bir çox insanda irəliyə çıxmış baş və dairəvi çiyinlərlə müşahidə olunan tipik qamət pozğunluğu formalaşıb. Bu vəziyyət boyun damarlarının sıxılmasına, qan dövranının pozulmasına və nəticədə baş ağrısı, halsızlıq və digər xoşagəlməz simptomlara yol açır.

“Döş qəfəsinin deformasiyası da ciddi təhlükə yaradır, çünki bu hal ürək-damar problemlərinin inkişaf mexanizmini işə sala bilər. Belə vəziyyətdə ürək ritm pozğunluqları, həmçinin yüksək qan təzyiqi müşahidə oluna bilər və bunlar birbaşa olaraq döş nahiyəsindəki onurğa problemləri ilə əlaqədardır,” – deyə Aleksandr Evdokimov vurğulayıb.