Beynəlxalq alimlər qrupunun yeni araşdırması göstərib ki, qara qarağat şirəsi beynin ön paylarına (frontal paylara) qan axınını həm istirahət zamanı, həm də zehni gərginlik dövrlərində artırır.

Azmedinfo.az xəbər verir ki, tədqiqatın nəticələri tandfonline.com platformasında dərc olunub.

Eksperimentdə 18–35 yaş arasında olan 20 sağlam könüllü iştirak edib. Onlara laboratoriyaya gələndə “Blackadder” növündən olan qara qarağat şirəsi içmək tapşırılıb. Bu şirə 500 milliqram polifenolla zənginləşdirilmişdi. Növbəti səfərlərində isə iştirakçılara rəngi və dadı oxşar olan plasebo içkisi verilib.

Alimlər yaxın infraqırmızı spektroskopiya üsulu ilə qan oksigenlə doyma səviyyəsini müşahidə edərək beynin qan dövranı aktivliyini qiymətləndiriblər.

Nəticələr göstərib ki, şirə qəbulundan 35 dəqiqə sonra sol ön payda oksigemoglobinin (oksigenlə zəngin hemoglobinin) səviyyəsi nəzərəçarpacaq dərəcədə artıb, dezoksigemoglobinin səviyyəsi isə azalıb. Bu, beynin daha çox oksigenlə təmin olunduğunu və damarların fəaliyyətinin yaxşılaşdığını göstərir. Həmçinin həmin nahiyədə ümumi qan həcminin artdığı qeydə alınıb.

Qara qarağatın tərkibində poli­fenolların, xüsusilə də antosianların miqdarı yüksəkdir. Bu bitki mənşəli birləşmələr damarların və ürəyin sağlamlığına müsbət təsir göstərir.

Alimlərin fikrincə, məhz bu maddələr azot oksidinin istehsalını artırır, bu da damarların genişlənməsinə səbəb olur və dopaminlə serotonin səviyyələrini tənzimləməklə beyin qan dövranını daha optimal vəziyyətə gətirir.