1996-cı ildən etibarən hər il oktyabrın 12-si Ümumdünya Səhiyyə Təşkilatının təşəbbüsü ilə bir çox ölkələrdə Dünya Artritlə Mübarizə Günü kimi qeyd olunur. Bu günün məqsədi revmatoloji xəstəliklər, xüsusən də artritin müxtəlif formaları barədə ictimai maarifləndirməni artırmaq, xəstəliyin erkən aşkarlanması və qarşısının alınması üçün tədbirlərin vacibliyinə diqqət yönəltməkdir.

Azmedinfo.az tibbi portalı ictimaiyyətin revmatoloji xəstəliklər barədə etibarlı tibbi bilgilərlə maariflənməsi məqsədilə paylaşım edir:

Artrit oynaqlarda ağrı, şişkinlik, hərəkət məhdudluğu və iltihabla xarakterizə olunan xəstəlikdir. Müasir həyat tərzi, az hərəkətlilik, artıq çəki, düzgün qidalanmama və stress bu xəstəliyin inkişafına səbəb olan əsas amillərdəndir.

Artritin vaxtında müalicə və reabilitasiyası xəstələrin həyat keyfiyyətini xeyli yaxşılaşdıra bilər. Bunun üçün həkimlərin, xəstələrin və cəmiyyətin birgə səyləri mühüm əhəmiyyət kəsb edir.

Sağlamlıq tövsiyələri:

- Hərəkətdə olun – gündəlik yüngül fiziki fəaliyyət, gəzinti və oynaqları qoruyan gimnastika artritin qarşısını almağa kömək edir.
- Çəkiyə nəzarət edin – artıq çəki oynaqlara əlavə yük salır və xəstəliyin gedişatını ağırlaşdıra bilər.
- Düzgün qidalanın – omeqa-3 yağ turşuları (balıq, kətan yağı), tərəvəz və meyvələrlə zəngin pəhriz iltihabı azaldır.
- Soyuqdan qorunun – oynaqları isti saxlamaq və ani temperatur dəyişikliklərindən çəkinmək lazımdır.
- Daimi tibbi nəzarətdə olun – erkən diaqnostika və həkim təyinatına əməl etmək xəstəliyin ağırlaşmasının qarşısını alır.

Sağlam oynaqlar aktiv və ağrısız həyatın əsas şərtidir.