Yeni tip nano hissəciklər xərçəng əleyhinə vaksinlərin təsirini gücləndirir

Azmedinfo.az "Cell Reports Medicine" (CRM) jurnalında dərc olunan tədqiqata istinadən yazır ki, Massaçusets Universitetinin alimləri xərçəng əleyhinə vaksinlərin təsirini kəskin şəkildə artıran yeni tip nano hissəciklər hazırlayıblar. 

Yaradılan lipid nano hissəciklər immun sisteminə iki “həyəcan siqnalı” daşıyır – STING və TLR4 siqnal yollarının aqonistləri. Bu kombinasiyanın sayəsində əsas immun hüceyrələr aktivləşib, interferonların sintezi artıb və siçanlar üzərində aparılan təcrübələrdə vaksinasiya effekti bir neçə dəfə yüksəlib. Preparatın tətbiqindən sonra heyvanların orqanizmi təkcə şiş hüceyrələrini məhv etməyib, həm də immun yaddaş formalaşdıraraq xəstəliyin təkrar inkişafının qarşısını alıb.

Yeni texnologiya universal platforma kimi işləyir – onu müxtəlif xərçəng növlərinə, o cümlədən melanoma, mədəaltı vəzi xərçəngi və üçqat neqativ süd vəzi xərçənginə uyğunlaşdırmaq mümkündür. Müəlliflərin sözlərinə görə, növbəti mərhələ təhlükəsizliyin yoxlanılması və insanların iştirakı ilə klinik sınaqlara hazırlıq olacaq.