Qaraciyər kistası, qaraciyər toxumasında içi şəffaf və qoxusuz maye ilə dolu xoşxassəli boşluqdur və həm qaraciyərin səthində, həm də dərin qatlarında yarana bilər, ölçüləri isə bir neçə millimetrdən 20–25 sm və daha artıq ola bilər. Kiçik ölçülü kistalar adətən əlamətsiz inkişaf edir, lakin böyüdükcə qarında şişkinlik, iştahanın azalması, çəki itkisi, sarılıq və təngnəfəslik kimi simptomlarla özünü göstərə bilər.

Azmedinfo.az xəbər verir ki, bu sözləri qastroenteroloq, hepatoloq və invaziv endoskopist Aqil Ağakişiyev bildirib.

Həkim qeyd edib ki, kistanın yaranma səbəbləri hələ də tam dəqiqləşməyib, lakin tibbdə bir sıra risk faktorları nəzərə alınır, bunlar arasında bətndaxili inkişaf pozuntuları, iltihabi proseslər və travmalar, hormonal preparatların uzunmüddətli qəbulu, qaraciyər sirrozu, öd daşı xəstəliyi və böyrəklərin polikistozu kimi digər xəstəliklər, eləcə də parazitar infeksiyalar, xüsusilə exinokokk qurdu yer alır.

"Əksər hallarda 4–5 sm-ə qədər olan kistalar yalnız müşahidə altında saxlanılır, lakin ölçüsü böyüdükdə, fəsadlar yarandıqda və ya sürətlə inkişaf etdikdə cərrahi müdaxilə tələb oluna bilər, müasir dövrdə isə bu əməliyyatlar əsasən laparoskopik üsulla aparılır ki, xəstələr üçün daha yüngül prosedur və qısa bərpa dövrü təmin olunur", - deyə ekspert vurğulayıb.