33-cü hestasiya həftəsində, cəmi 1640 qram çəkidə dünyaya gələn körpə doğulduğu andan ağır vəziyyətdə olub. O, ilk günlərdən Lənkəran Perinatal Mərkəzində həkim nəzarətinə alınıb və 26 gün ərzində intensiv müalicə alıb.

Azmedinfo.az xəbər verir ki, Mərkəzin məlumatına görə, vəziyyətin mürəkkəbliyi, multidisiplinar yanaşmaya ehtiyac yaranması səbəbindən körpə Respublika Pediatriya Mərkəzinin tabeliyində fəaliyyət göstərən Ə.Qarayev adına Uşaq Klinik Xəstəxanasının Yenidoğulmuşların Reanimasiya şöbəsinə köçürülüb.

Xəstəxanaya qəbul edilən zaman körpədə poliorqan çatışmazlığı əlamətləri müşahidə olunub və onun vəziyyəti “hədsiz ağır” kimi qiymətləndirilib. Körpə dərhal küvezə yerləşdirilərək süni tənəffüs cihazına bağlanıb, həyat göstəricilərinin stabilləşdirilməsi istiqamətində zəruri tədbirlər görülüb.

Həkimlərin peşəkar və koordinasiyalı müalicə tədbirləri nəticəsində körpənin vital funksiyalarında tədricən müsbət dinamika izlənib. Qısa müddətdə vəziyyəti sabitləşən körpə tam sağalma ilə evə buraxılıb.