Rusiya Səhiyyə Nazirliyi ölkəyə gələn miqrantlar, əcnəbilər, vətəndaşlığı olmayan şəxslər, eləcə də qaçqın statusu almaq və ya müvəqqəti sığınacaq üçün müraciət edən şəxslərin tibbi müayinəsi ilə bağlı qaydalarda dəyişikliklər edilməsini təklif edib.

Azmedinfo.az medvestnik.ru-ya istinadən yazır ki, 2026-cı il martın 1-dən etibarən bu kateqoriyaya aid şəxslər arasında B və C tipli viruslu hepatitlərə yoluxma hallarının müəyyənləşdirilməsi planlaşdırılır. Yeni qaydalara əsasən, Rusiyaya daxil olan əcnəbilər hepatit B və C viruslarının həm kəskin, həm də xroniki formaları üzrə laborator analizlər verməli olacaqlar.

Hazırda aparılan tibbi yoxlamalar narkotik vasitələrdən istifadə, eləcə də ətraf mühit üçün təhlükə yaradan bir sıra xəstəliklər — İnsan İmmunçatışmazlığı Virusu (İİV), vərəm, sifilis və cüzamın aşkarlanmasını əhatə edir.

Qaydalara əsasən, miqrantların tibbi müayinədən keçməsi Rusiyada əmək fəaliyyəti üçün icazə, müvəqqəti və ya daimi yaşayış hüququ əldə etmək baxımından da zəruridir. Qanunvericilik “Rusiya Federasiyasında əcnəbilərin hüquqi statusu haqqında” sənədlə tənzimlənir. Bu qanuna görə, ölkəyə iş məqsədilə gələn şəxslər giriş tarixindən etibarən 30 gün ərzində, digər məqsədlərlə gələnlər isə 90 gün müddətində tibbi müayinədən keçməlidirlər.