Assit dedikdə qarın boşluğunda maye toplanması başa düşülür. Bu vəziyyət ən çox qaraciyər sirrozu zamanı yaranır. Sirroz zamanı qaraciyər toxuması zədələndiyindən orqan kifayət qədər zülal (xüsusilə albumin) istehsal edə bilmir, nəticədə qan dövranı pozulur və maye qarın boşluğunda toplanır.

Azmedinfo.az xəbər verir ki, bu fikirləri bildirən qastroenteroloq, hepatoloq, invaziv endoskopist Aqil Ağakişiyev qeyd edib ki, qaraciyərin zəifləməsi ilə bərabər, qan axınının azalması böyrəklərə də təsir edir. Böyrəklər azalan qan təchizatına cavab olaraq orqanizmdə su və duzun saxlanmasına səbəb olur ki, bu da assitin daha da artmasına gətirib çıxarır.

Həkim bildirib ki, assit yalnız qaraciyər xəstəlikləri ilə deyil, eyni zamanda ürək çatışmazlığı, böyrək patologiyaları, perikard qalınlaşması, qarın boşluğu infeksiyaları və bəzi onkoloji proseslər zamanı da inkişaf edə bilər. Buna görə də bu əlamət bəzən digər orqanların problemlərindən də xəbər verə bilər.

Qarın nahiyəsində şişkinlik, gərginlik və ağırlıq hiss etdikdə mütləq həkimə müraciət etmək lazımdır. Assit bədənin xəbərdarlıq siqnalıdır və erkən diaqnoz sayəsində xəstəliyin gedişini nəzarətdə saxlamaq, ağırlaşmaların qarşısını almaq mümkündür.”