Ankarada “1–31 oktyabr – Süd vəzi xərçəngi ilə bağlı fərqindəlik ayı” çərçivəsində xərçəngə qalib gəlmiş və müalicəsi davam edən xəstələrin, eləcə də tibb işçilərinin iştirakı ilə “çəhrayı yürüş” keçirilib.

Azmedinfo.az "T24"də istinadən yazır ki, xüsusi bir xəstəxananın təşkilatçılığı ilə Gölbaşı rayonundakı Eymir gölü sahilində baş tutan yürüşdə sağalan xəstələr, hazırda müalicə alanlar və tibb mütəxəssisləri iştirak ediblər. Qadın və kişilərdən ibarət onlarca nəfər çəhrayı köynəklər geyinərək göl ətrafında addımlayıb. Yürüş zamanı “Erkən diaqnoz həyat xilas edir” və “Gecikmə, sağlam qal” şüarları səsləndirilib, erkən diaqnozun əhəmiyyətinə diqqət çəkilib. Yürüşün sonunda iştirakçılara medal təqdim olunub.

Süd vəzi və endokrin cərrahı professor Ramazan Yıldız bildirib ki, süd vəzi xərçəngi yalnız bir ixtisasın müalicə edə biləcəyi xəstəlik deyil: “Süd vəzi xərçənginin müalicəsində radiyasiya onkologiyası, onkologiya, psixoterapiya, dietologiya və patoloji kimi bütün sahələrin birgə iştirakı vacibdir. Müalicə müddətində xəstənin psixoloji vəziyyəti çox önəmlidir. Xəstənin özünü buraxmaması lazımdır. Biz bu xəstəliyi komanda halında müalicə edə bilirik, lakin xəstə də ‘mən bu xəstəliyi məğlub edəcəyəm’ düşüncəsi ilə hərəkət etməlidir. Əgər bu inam varsa, uğur da mümkündür. Biz də bu prosesdə dəstək oluruq.”

52 yaşlı Hikmət Ünal Demir isə süd vəzi xərçənginə qalib gəldiyini bildirib. O, xəstəliyin rutin müayinələr zamanı aşkarlandığını deyib: “Əvvəlcə xoşxassəli bir törəmə kimi görünürdü. Lakin aparılan biopsiya və iki əməliyyatdan sonra cəmi üç həftə ərzində üçüncü mərhələli süd vəzi xərçəngi olduğu ortaya çıxdı. Pandemiya dövründə mütəmadi müayinələrimi bir qədər gecikdirmişdim. Halbuki illik müayinələrimi etdirirdim. Burada ‘Erkən diaqnoz həyat xilas edir’ ifadəsinin nə qədər doğru olduğunu anladım. Düzgün diaqnoz, düzgün əməliyyat, düzgün müalicə, öz səylərim və ailəmin dəstəyi ilə bu xəstəliyi arxada qoydum. Qadınlara demək istəyirəm ki, özlərini sevsinlər, bədənlərindəki dəyişiklikləri vaxtında hiss etsinlər və xərçəngdən deyil, gecikməkdən qorxsunlar.”

Hal-hazırda kimyaterapiya müalicəsi alan Günay Açık da yürüşdə iştirak edib. O, yuxunun, sosial həyatın pozitiv olmasının və sağlam qidalanmanın, eyni zamanda müntəzəm müayinələrin vacibliyinə diqqət çəkib: “Mənim fikrimcə stress də bu xəstəlikdə mühüm rol oynayır. Bunu şəxsi təcrübəmdən deyirəm. Bu xəstəlik mənim üçün bir dərs oldu. Bundan sonra həyata daha rahat və müsbət baxmağa qərar verdim və düşünürəm ki, buna nail oldum. Qadınlar da həyata bu baxışla yanaşmalıdır.”