Manual terapevt Aleksey Popov müsahibəsində yanlış qamətin fəsadları barədə məlumatları bölüşüb. Həkimin bildirdiyinə görə, bu problem demək olar ki, əhalinin 90 faizinə təsir edir və çox vaxt sonradan qazanılır. Mütəxəssis bildirib ki, düzgün bədən duruşunu ömür boyu qorumaq yalnız onurğa sütununun deyil, bütün orqanizmin sağlamlığı üçün həyati əhəmiyyət daşıyır.

Azmedinfo.az “Gazeta” nəşrinə istinadən yazır ki, həkimin sözlərinə görə, səhv qamət bir çox xəstəliklərin yaranmasına səbəb ola bilər. Bu hal baş ağrılarına, əzələ spazmlarına, hətta tənəffüs sistemi problemlərinə yol aça bilər. O, izah edib ki, bədənin düzgün olmayan vəziyyəti ağırlıq mərkəzinin yerini dəyişdirir və onurğanın təbii əyriliklərini pozur. Nəticədə, döş hissəsində artıq əyriliyin yaranması – hiper kifoz və digər deformasiyalar kimi vəziyyətlər inkişaf edə bilər.

Maraqlı fakt

Tədqiqatlar göstərir ki, düzgün qamət yalnız fiziki sağlamlığa deyil, həm də əhval-ruhiyyəyə və özünə inama müsbət təsir göstərir. Yaxşı qamətə malik insanlarda özünə qiymət daha yüksək, stress halları isə daha az müşahidə olunur.

Mənfi nəticələrin qarşısını almaq üçün terapevt müntəzəm fiziki məşqləri və fizioterapiyanı tövsiyə edib: "Əzələlərin möhkəmləndirilməsinə və bədənin elastikliyinin artırılmasına yönəlmiş məşqlər kompleksi düzgün qaməti bərpa etməyə kömək edə bilər".

Həkim, həmçinin gündəlik həyatda bədən duruşuna şüurlu yanaşmanın vacibliyini vurğulayır. Hətta vərdişlərdə edilən sadə dəyişikliklər, məsələn, erqonomik mebellərdən istifadə və ya oturaq iş zamanı fasilələr vermək sağlamlığın ümumi vəziyyətini əhəmiyyətli dərəcədə yaxşılaşdıra bilər.