Səhiyyə Nazirliyinin Elmi-Tədqiqat Travmatologiya və Ortopediya İnstitutunun baş həkimi, baş direktorun müavini Nizami Məmmədovun sözlərinə görə, sümük sağlamlığını qoruma tədbirləri uşaqlıq və gənclik dövründən başlanmalıdır. Ekspertin fikrincə, məhz bu dövrdə orqanizmdə formalaşan maksimal sümük kütləsi gələcək yaşlarda osteoporozun qarşısını alan əsas amildir.

Azmedinfo.az xəbər verir ki, həkimin bildirdiyinə görə, osteoporoz uzun müddət simptomsuz keçən, lakin ciddi nəticələrə gətirib çıxaran “səssiz epidemiya” sayılır. Xəstəlik sümük toxumasının zəifləməsi və kövrəkləşməsi ilə müşahidə olunur, nəticədə minimal travma belə sınıqlara səbəb ola bilər. “Osteoporozun ən təhlükəli tərəfi ondadır ki, insan illərlə bu prosesi hiss etmir, yalnız sınıq baş verdikdə xəstəliyin mövcudluğu üzə çıxır”, – deyə N.Məmmədov vurğulayıb.

Mütəxəssis qeyd edib ki, xəstəliyin əsas risk qrupunu menopauza dövründə olan qadınlar, həmçinin hərəkətsiz həyat tərzi sürən, qidalanmasında kalsium və D vitamini çatışmazlığı olan şəxslər təşkil edir. Eyni zamanda siqaret, alkoqol və bəzi dərman preparatlarının uzunmüddətli qəbulu da sümük metabolizmini mənfi təsirləyir.

N.Məmmədovun sözlərinə görə, osteoporozun profilaktikası müalicədən daha təsirlidir. Uşaqlıqdan düzgün qidalanma, aktiv həyat tərzi, günəş işığından faydalanmaq və zərərli vərdişlərdən uzaq durmaq sümük sağlamlığının əsas şərtləridir. Orta və yaşlı yaşlarda isə densitometriya müayinəsi, həkim nəzarəti altında kalsium və D vitamini qəbulu tövsiyə olunur.

Ekspert sonda vurğulayıb ki, erkən diaqnostika, vaxtında müalicə və profilaktik tədbirlər osteoporozun qarşısını almaqda əsas rol oynayır: “Əgər hər bir insan sümük sağlamlığını qorumağı gündəlik həyatının tərkib hissəsinə çevirsə, gələcəkdə sınıq riski və həyat keyfiyyətinin azalması kimi təhlükələr minimuma enər.”