Mərkəzi Gömrük Hospitalının Travmatologiya və Ortopediya şöbəsinin rəisi, yüksəkixtisaslı travmatoloq-ortoped Ramin Rzayev pasiyent üzərində uğurla icra etdiyi diz oynağının ön çarpaz bağının qapalı – artroskopik üsulla bərpası və artroskopik parsial meniskektomiya əməliyyatı barədə ətraflı məlumat verib.

Azmedinfo.az xəbər verir ki, Dr. Ramin Rzayev bildirib ki, ön çarpaz bağın zədələnməsi idman travmaları və ya qəfil hərəkətlər nəticəsində tez-tez rast gəlinən diz oynağı problemlərindən biridir. Bu bağ dizin sabitliyini təmin edən əsas strukturlardan biri olduğuna görə, onun zədələnməsi pasiyentin gündəlik aktivliyini və həyat keyfiyyətini ciddi şəkildə məhdudlaşdıra bilər.

Qapalı – artroskopik üsul bu cür əməliyyatlarda ən müasir və az travmatik metodlardan hesab olunur. Bu üsul zamanı diz oynağına böyük kəsik aparılmadan, xüsusi optik cihaz vasitəsilə daxil olunur və zədələnmiş toxumalar dəqiq şəkildə bərpa edilir. Artroskopik parsial meniskektomiya isə meniskin yalnız zədələnmiş hissəsinin çıxarılması ilə həyata keçirilir ki, bu da sağlam toxumaların qorunmasına, reabilitasiya müddətinin qısalmasına və pasiyentin daha tez aktiv həyata qayıtmasına imkan yaradır.

Mərkəzi Gömrük Hospitalında tətbiq olunan bu cür müasir, minimal invaziv texnologiyalar əməliyyat risklərini azaldır və daha effektiv müalicə nəticələri əldə etməyə şərait yaradır.

Ətraflı videoda