Günəş yenidən aktivliyini artırıb. Yaxın günlərdə gözlənilən plazma axını güclü geomaqnit qasırğasına səbəb ola bilər. Bu hadisə həm meteohəssas insanların səhhətinə, həm də bəzi texniki sistemlərin fəaliyyətinə mənfi təsir göstərəcək.

Azmedinfo.az “Yedinstvo” nəşrinin məlumatına istinadən yazır ki, hazırda Günəş 11 illik aktivlik dövrünün pik mərhələsini yaşayır. Müşahidə olunan güclü Günəş partlayışları adətən koronal kütlə atılmaları ilə nəticələnir yəni elektron və protonlardan ibarət plazma buludlarının kosmosa atılması ilə. Bu buludlar Yer maqnit sahəsinə çarpdıqda, geomaqnit pozğunluqları baş verir.

Mütəxəssislərin proqnozlarına görə, atılan kütlənin həcmi 10 milyard tona, hərəkət sürəti isə saniyədə 400-dən 2000 kilometrədək çata bilər.

Artıq 25 oktyabrdan etibarən planetimiz uzunmüddətli maqnit qasırğası zonasına daxil olur, bu proses 31 oktyabra qədər davam edəcək. Mövcud günəş küləyi axınının gücü Kp=6 səviyyəsində geomaqnit indeksinin yaranmasına səbəb ola bilər ki, bu da “güclü qasırğa” kateqoriyasına aiddir.

Təcrübə göstərir ki, Kp 4–5 səviyyəsindəki pozğunluqlar belə bəzən radioəlaqə və naviqasiya sistemlərində nasazlıqlara, eləcə də enerji şəbəkələrində fasilələrə yol açır. Mütəxəssislər bu dəfə də oxşar hadisələrin baş verə biləcəyini istisna etmirlər.

Meteohəssas insanlarda bu dövrdə baş ağrısı, təzyiqin dəyişməsi, yuxusuzluq və yorğunluq kimi simptomların müşahidə olunması mümkündür. Həkimlər belə şəxslərə fiziki və emosional gərginlikdən qaçmağı, bol maye qəbul etməyi və açıq havada qısa gəzintiləri artırmağı məsləhət görürlər.