Son vaxtlar onkoloji xəstələr arasında internetdə geniş müzakirə olunan və bəzilərinin əldə etməyə çalışdığı “Kreolin” adlı preparata maraq artıb. Bu maddə əslində mal-qaranın dezinfeksiyasında istifadə olunan, baytarlıq apteklərində təxminən 3 manata satılan kimyəvi məhluldur.

Azmedinfo.az xəbər verir ki, bəzi xərçəng xəstələri elmi əsas olmadan bu vasitənin müalicəvi təsirə malik olduğuna inanaraq onu qəbul edirlər. Baytarlıq apteklərində aparılan sorğular da bu tendensiyanı təsdiqləyir. Satıcıların sözlərinə görə, “Kreolin”lə yanaşı, “Fraksiya2” adlı başqa bir baytarlıq preparatı da onkoloji xəstələr tərəfindən alınır.

Məsələ ilə bağlı tibbi onkologiya uzmanı Elvin Çələbiyev bildirib ki, bu preparatların xərçəngin müalicəsində effektivliyinə dair heç bir elmi sübut yoxdur: “Əksinə, bu kimyəvi maddələrin istifadəsi insan orqanizmində ciddi zədələnmələrə, daxili orqanların fəaliyyətində pozğunluqlara səbəb ola bilər.”

Həkim xəstələri internet mənbələrinə və şayiələrə əsaslanmadan, yalnız mütəxəssis nəzarəti altında müalicə almağa çağırıb.