Artıq böyrək daşı əməliyyatları da İcbari Tibbi Sığorta üzrə Dövlət Agentliyinin (İTSDA) xidmətlər zərfinə daxil edilib. Bu qərar vətəndaşların maddi yükünü azaltmaqla yanaşı, vaxtında tibbi müdaxiləyə çıxışı da asanlaşdıracaq.

Azmedinfo.az xəbər verir ki, Agentlikdən verilən məlumata görə, icbari tibbi sığorta hesabına həyata keçirilən bu əməliyyatlar dövlət tibb müəssisələrində icra olunur. Prosedura daşların ölçüsünə və yerləşdiyi nahiyəyə uyğun olaraq müxtəlif üsullarla — endoskopik, laparoskopik və ya açıq əməliyyatlarla aparılır.

Qeyd edək ki, böyrək daşı xəstəliyi ölkəmizdə geniş yayılmış uroloji problemlərdən biridir. Müalicənin vaxtında aparılması orqanizmdə ciddi fəsadların, o cümlədən böyrək çatışmazlığının qarşısını almağa kömək edir.

İcbari tibbi sığortanın əhatə dairəsinin genişlənməsi nəticəsində vətəndaşlar bir çox cərrahi və terapevtik xidmətlərdən, o cümlədən böyrək, ürək və digər həyati vacib əməliyyatlardan artıq dövlət hesabına yararlana bilirlər.