Missuri Universitetinin Tibb Məktəbinin alimləri müəyyən ediblər ki, 2-ci tip şəkərli diabetin müalicəsində istifadə olunan "Empagliflozin" adlı preparat yalnız qanda şəkərin səviyyəsini aşağı salmaqla kifayətlənmir, həm də yaşlı insanlarda qan damarlarının vəziyyətini yaxşılaşdıra bilər.

Azmedinfo.az "Medikforum"a istinadən yazır ki, siçanlar üzərində aparılan tədqiqatda göstərilib ki, bu dərman arteriyaların sərtliyini azaldır və yaşla elastikliyini itirən damarların funksiyasını yaxşılaşdırır. Bu dəyişikliklər ürək-damar xəstəlikləri riskinin artması ilə əlaqədardır və bu xəstəliklər yaşlı insanlar arasında ölümün əsas səbəblərindən biridir.

Tədqiqatın nəticələri "Empagliflozin" kimi SGLT2 inhibitorlarının diabeti olmayan yaşlı insanların da ürək və damar sağlamlığını qorumaq üçün istifadəsinə imkan aça bilər. Növbəti mərhələ isə dərmanın damarların qocalmasını ləngitməkdə nə dərəcədə effektiv olduğunu yoxlamaq məqsədilə insanlar üzərində klinik sınaqların aparılması olacaq.