Ürəyin ömür boyu vəziyyətini müəyyən edən əsas dövr 17–25 yaş aralığı hesab olunur.

Azmedinfo.az xəbər verir ki, bu barədə "The Conversation" nəşrinə Cənubi Karolina Universitetinin tibb bacılığı kafedrasının dosenti Cüel Skott məlumat verib.

Onun sözlərinə görə, ürək sağlamlığının pisləşməsi uzunmüddətli prosesdir və bu, qəfil baş vermir, tədricən, çox vaxt insanın xəbəri olmadan inkişaf edir. Bir sıra tədqiqatlar göstərib ki, bu dönüş nöqtəsi artıq 17 yaşında başlayır. Məhz bu gənc yaşdan etibarən qidalanma keyfiyyəti, fiziki aktivlik, yuxu və qan təzyiqi ilə bağlı göstəricilərdə azalma müşahidə olunur.

Orta məktəbi bitirənə qədər bir çox insanlarda artıq ilk risk amilləri formalaşır. Ən çox rast gəlinən hal isə aterosklerozdur. Bu zaman qan damarlarında piy lövhələri əmələ gəlir, qan dövranını çətinləşdirir və infarkt riskini artırır.

Mütəxəssisin sözlərinə görə, əsas səbəblərdən biri piylənmədir. Bundan əlavə, oturaq həyat tərzi, tez-tez fastfud, alkoqol və nikotin qəbulu da risk amilləri sırasındadır.

Tədqiqatçıları xüsusilə narahat edən məqam gənclər arasında nikotin istifadəsinin artmasıdır. ABŞ-da 2002–2018-ci illər arasında 18–23 yaşlılar arasında siqaret, veyp və digər nikotin məhsullarından istifadə edənlərin faizi demək olar ki, iki dəfə artıb. Nikotin isə damarların vəziyyətinə mənfi təsir göstərir və aterosklerotik lövhələrin yaranmasını sürətləndirir.