Britaniyalı ailə həkimi Babak Aşrafi soyuq mövsümdə hər gün ən azı on dəqiqə açıq havada gəzməyi tövsiyə edib.

Azmedinfo.az "The Guardian" nəşrinin məlumatına istinadən yazır ki, mütəxəssisin sözlərinə görə, qısa müddətli gəzintilər həm fiziki, həm də emosional sağlamlıq üçün faydalıdır onlar apatiya və mövsümi soyuqdəymələrin riskini azaldır.

Həkim bildirib ki, təmiz hava və gün işığı orqanizmdə D vitamini sintezi və immun sisteminin normal fəaliyyəti üçün vacibdir.

“İstər hava tutqun, istərsə də sərin olsun, az da olsa açıq havaya çıxmaq, təbii işıq qəbul etmək və bir qədər hərəkət etmək vacibdir,” – deyə həkim vurğulayıb.

O, gündəlik gəzintilərlə yanaşı, qripə qarşı peyvənd olunmağı və əsas gigiyena qaydalarına əməl etməyi, xüsusilə ictimai nəqliyyatda səyahətdən və izdihamlı yerlərə getdikdən sonra əlləri sabunla tez-tez yumağı məsləhət görüb. Bu sadə tədbirlər viruslara yoluxma riskini əhəmiyyətli dərəcədə azaldır.

Həkim sağlamlığın əsasını təşkil edən üç vərdişi də xatırladıb. Bunlar balanslaşdırılmış qidalanma, yaxşı yuxu və müntəzəm fiziki aktivlikdir. Xüsusilə qış aylarında orqanizmin vitamin və minerallarla təmin olunmasına diqqət yetirmək vacibdir.

Ekspert həmçinin qeyd edib ki, bir çox insanlar vitamin əlavələrinin faydasını şişirdirlər. Qida rasionu kasıb olan insanlarda bu əlavələr çox vaxt effektiv olmur.

“Vitaminləri mümkün qədər qidalar vasitəsilə qəbul etmək, əlavələrə isə yalnız təsdiqlənmiş çatışmazlıq halında müraciət etmək daha doğrudur,” – deyə həkim əlavə edib.