Süd vəzi xərçəngi dünyada ən çox rast gəlinən bədxassəli şişlər arasında aparıcı yer tutur. Bu xəstəlik ölüm hallarına görə beşinci yerdə qərarlaşır və illər keçdikcə həm dünyada, həm də Azərbaycanda yayılma tendensiyası artır. Bu səbəbdən süd vəzi xərçəngi problemi təkcə tibbi deyil, həm də sosial baxımdan son dərəcə aktual hesab olunur.

Azmedinfo.az-a açıqlamasında bu fikirləri radioloq, tibb üzrə fəlsəfə doktoru Günel Əliyeva bildirib.

Həkimin sözlərinə görə, xəstəliyin qarşısının alınmasında radioloqların əsas vəzifəsi onun erkən mərhələdə aşkarlanmasıdır. Bu məqsədlə dünyada artıq 1960-70-ci illərdən etibarən skrininq proqramları tətbiq edilir və aparılan elmi tədqiqatlar bu proqramların ölüm hallarını 30%-ə qədər azaltdığını təsdiqləyib.

“Azərbaycanda da bu istiqamətdə mühüm işlər görülür. Milli Onkologiya Mərkəzi və digər tibb müəssisələri ilə yanaşı, biz radioloqlar da qadınlar arasında maarifləndirmə işlərinə xüsusi önəm veririk. Məqsədimiz yalnız erkən diaqnostikanı təmin etmək deyil, həm də qadınlarımızı vaxtında müayinəyə cəlb etməklə düzgün marşrutlaşdırmanı həyata keçirməkdir”, – deyə radioloq qeyd edib.

Bildirib ki, hazırda ölkədə, o cümlədən Bakı Sağlamlıq Mərkəzində, müasir 3D mamoqrafiya, ultrasəs müayinəsi və biopsiya imkanlarına malik kabinetlər fəaliyyət göstərir: “Bu texnologiyalar sayəsində biz qadınlarımıza daha dəqiq diaqnostika və effektiv xidmət göstəririk. Süd vəzi xərçənginin müalicəsində əsas məsələ düzgün diaqnostik algoritmin qurulmasıdır.”

Günel Əliyeva həmçinin qadınlara yaşa uyğun profilaktik müayinələrin vacibliyini xatırladır: “20 yaşdan yuxarı xanımlar ildə bir dəfə ultrasəs müayinəsindən keçməli, 40 yaşdan yuxarı qadınlar isə ildə bir dəfə 2D və ya 3D mamoqrafiya etdirməlidirlər. Toxuma sıxlığından asılı olaraq əlavə ultrasəs müayinəsi də aparılır. Əgər hər hansı dəyişiklik aşkarlanarsa, həmin xanımlar ya müşahidəyə götürülür, ya da vaxtında onkoloqa yönləndirilir.”

Sonda həkim qadınlara müraciət edərək vurğulayıb: “Hər bir qadın ailənin dayağı, həyatın bəzəyidir. Öz sağlamlığımıza biganə qalmayaq. Vaxtında müayinədən keçmək və mütəxəssislərə müraciət etmək həyat qurtarır.”