Soyuq havaların yaxınlaşması ilə bədənin yükü artır, gün işığı azalır, temperatur düşür, virus infeksiyalarının sayı çoxalır. Mütəxəssislər bildirirlər ki, bu dövrdə immun sistemini əvvəlcədən möhkəmləndirmək vacibdir. Bunun üçün düzgün qidalanma, fiziki aktivlik, sağlam yuxu və xəstəliklərin profilaktikası mühüm rol oynayır.

Azmedinfo.az "İsvestiya" nəşrinə istinadən yazır ki, immunoloq Oksana Visalova vurğulayıb ki, immunitetin güclü qalması qidalanmadan birbaşa asılıdır. O, tərəvəz, meyvə, göyərti və C, D, A, E vitaminləri ilə zəngin məhsulların yağlı balıq, turş kələm, göbələk və yaşıl tərəvəzlərin rasionda olmasını tövsiyə edib. Qidalanma ilə yanaşı, kifayət qədər maye qəbul etmək, isti içkilərə üstünlük vermək və alkoqolu məhdudlaşdırmaq da vacibdir.

Dietoloq-endokrinoloq Angelina Vodolazskayanın sözlərinə görə, qışda immunitet temperatur fərqləri və virus aktivliyi səbəbindən daha zəif olur, buna görə hərəkətsiz qalmaq olmaz. Gündəlik açıq havada gəzinti və yüngül fiziki fəaliyyət orqanizmin müqavimətini artırır.

Vaksinoloq Yevgeni Timakov isə bədəni soyuğa tədricən öyrəşdirməyi, məsələn, boğazı sərin su ilə qarqara etməyi immunitet üçün faydalı hesab edir.

Terapevt və immunoloq Yuliya Astapova bildirib ki, yuxu rejiminin sabit qalması hormon balansına və bədənin bərpasına kömək edir. O, gündə 7–8 saat yatmağı və yatmazdan əvvəl elektron cihazlardan uzaq durmağı məsləhət görür.

Terapevt Natalya Lyubimova isə xəstəliklərin qarşısını almaq üçün ildə ən azı bir dəfə profilaktik müayinə keçməyi tövsiyə edib. Həkimlər xəbərdarlıq edirlər ki, immonustimulyatorların özbaşına qəbulu təhlükəli ola bilər.

Rusiya Səhiyyə Nazirliyi qış mövsümünə hazırlıq üçün həkimlə məsləhətləşməyi, lazımi analizlər verməyi və ehtiyac olduqda qripə qarşı peyvənd olunmağı tövsiyə edir.