Alimlər "fəstfud"la alkoqol arasında gözlənilməz əlaqə aşkar ediblər. Yeni araşdırmanın nəticələrinə görə, yağlı və şirin qidalardan imtina edib sağlam qidalanmaya keçmək alkoqol asılılığının yaranma riskini yüksəldə bilər.

Azmedinfo.az xəbər verir ki, tədqiqatın nəticələri “Alcohol, Clinical and Experimental Research” jurnalında dərc olunub.

Təcrübə siçanlar üzərində aparılıb. İlk mərhələdə onlara yağlı və şirin yeməklər verilib, daha sonra isə sağlam qidalanmaya keçirilib. Nəticədə, məhz bu qrup siçanlar suya nisbətən alkoqolu üstün tutublar.

Alimlər bu dəyişimi pəhrizin dəyişməsindən sonra bağırsaq bakteriyalarının tərkibində baş verən dəyişikliklərlə izah edirlər. Məhz bu dəyişikliklər alkoqola meyli artıran maddələrin yaranmasına, nəticədə isə beynin “mükafat sistemi”nin fəaliyyətinin pozulmasına səbəb olub.

Tədqiqat müəllifləri bu mexanizmi sadə dillə belə izah edirlər: insan zərərli qidaları qəfil dayandırdıqda, onun bağırsaq bakteriyaları “etiraz edir”, bu da içki arzusuna səbəb olur.

Araşdırma müəllifləri sağlam qidalanmaya keçidi tədricən və ehtiyatla həyata keçirməyi tövsiyə edirlər. Qidalanma vərdişlərindən kəskin imtina bədənə zərər verə bilər, xüsusən də əgər insanın pəhrizində balanssızlıq və alkoqolla bağlı problemlər mövcuddursa, bu hallar daha da güclənə bilər.