Neoadyuvant kimyaterapiya şişin ölçülərini azaltmaq, həmçinin cərrahiyyədə süd vəzinin qorunub saxlanmasına müvəffəq olan əməliyyatların sayını günbəgün artırmaq bacarığına görə son illərdə dünya tibbində onkoloqların ən mühüm silahına çevrilib. Bundan əlavə, ilkin şişin və limfa düyünlərinin sistemli müalicəyə reaksiyasını qiymətləndirməkdə bir sıra üstünlüklərə malikdir. Neoadyuvant kimyaterapiyaya yüksəksəviyyəli tam patoloji cavab süd vəzi xərçəngində ən etibarlı sağqalım proqnozlaşdırıcısıdır.

Azmedinfo.az xəbər verir ki, Azərbaycan Cərrahiyyə, Qastroenterologiya və Onkologiya Cəmiyyətinin sədri, Liv Bona Dea Hospitalın şöbə müdiri Altay Əliyevin rəhbərlik etdiyi tədqiqatçılar qrupunun apardığı elmi araşdırmaların nəticələri dünyanın ən qabaqcıl beynəlxalq xülasələndirmə bazalarında yer alan yüksək impakt faktorlu "Avrasiya tibbi tədqiqatlar jurnalı"nda işıq üzü görüb.

Azərbaycanlı alimlərin əldə etdikləri elmi yeniliklər 2016-2023-cü illərdə süd vəzi xərçənginə görə Liv Bona Dea Hospitalda müalicə alan xəstələrdə neoadjuvant kimyaterapiyadan sonra əldə edilmiş uğurlu nəticələrin elmi-klinik nəticələrə söykənir. Qeyd edək ki, sonradan cərrahiyyə əməliyyatı keçirməyən xəstələr tədqiqatdan çıxarılıb. Beləliklə, aparılan tədqiqat ümumilikdə orta yaş həddi 47 olan 151 xəstəni özündə birləşdirib. Onların yalnız 3%-də I dərəcəli şiş (n=4), 37%-də III dərəcəli şiş (n=57), böyük əksəriyyətində isə II dərəcəli şiş (60%, n=90) aşkarlanıb.

"Süd vəzi xərçənginin alt tipləri arasında neoadyuvant kimyaterapiyadan sonra patoloji cavab və sağqalma: Azərbaycandan klinik-patoloji və sağqalma göstəricilərinin təhlili" adlı məqalədə müəlliflər aparılan tədqiqatın bütün mərhələrini və informasiya bazasını hərtərəfli şərhini veriblər.

Azərbaycan Cərrahiyyə, Qastroenterologiya və Onkologiya Cəmiyyətinin mütəxəssislərindən və Liv Bona Dea Hospitalın həkimlərindən ibarət tədqiqatçı qrupunun qazandığı elmi nəticələri özündə əks etdirən adıçəkilən məqalənin tam mətnini buradan oxuya bilərsiniz.