TƏBİB ucqar bölgələrdə əhaliyə tibbi xidmətlərin əlçatanlığını artırır

05 Noyabr 2025

494

TƏBİB ucqar bölgələrdə əhaliyə tibbi xidmətlərin əlçatanlığını artırır

TƏBİB tərəfindən ucqar kənd ərazilərində yaşayan əhalinin tibbi xidmətlərə əlçatanlığının artırılması, ahıl və həssas qruplara daxil olan şəxslərin, eləcə də uşaqların tibbi müayinələrə cəlb olunması, profilaktik tədbirlərin vaxtında həyata keçirilməsi məqsədilə “Ucqar ərazilərdə tibbi xidmət” layihəsi davam etdirilir.

Azmedinfo.az xəbər verir ki, TƏBİB və Yeni Klinikanın təşkilatçılığı, İcbari Tibbi Sığorta üzrə Dövlət Agentliyi, Azərbaycan Həmkarlar İttifaqları Konfederasiyasının və Azərbaycan Səhiyyə İşçiləri Həmkarlar İttifaqının dəstəyi ilə növbəti dəfə Lerik Rayon Mərkəzi Xəstəxanasında həyata keçirilən layihə çərçivəsində 200-dən çox vətəndaşa ixtisaslı həkim-mütəxəssislər tərəfindən oftalmoloji tibbi xidmətlər göstərilib.

Layihə çərçivəsində ərazidə yaşayan həssas əhali qrupları, o cümlədən müharibə iştirakçıları və şəhid ailələrinin üzvləri də tibbi müayinələrdən keçiblər. Müayinələr zamanı ixtisaslı tibbi xidmətə ehtiyacı yaranan sakinlərin aidiyyəti tibb müəssisələrinə yönləndirilməsi təmin edilib.

Bununla yanaşı, müayinələrə cəlb olunan sakinlərə ölkəmizin səhiyyə sahəsində həyata keçirilən yeniliklər və tibbi xidmətlərə əlçatanlığın təmin edilməsi istiqamətində görülən işlərlə bağlı məlumat verilib.

Qeyd edək ki, “Ucqar ərazilərdə tibbi xidmət” layihəsinin növbəti mərhələlərdə digər bölgələrdə də həyata keçirilməsi planlaşdırılır.