Rusiyalı mütəxəssislər hepatit C-ni diaqnostika etmək üçün dünyanın ilk sürətli testini hazırlayıblar.

Azmedinfo.az "Gazeta" nəşrinə istinadən xəbər verir ki, Rospotrebnadzorun Epidemiologiya Mərkəzi Elmi-Tədqiqat İnstitutunun alimləri dövrəvi izotermik amplifikasiya (LAMP) üsulu əsasında virus mənşəli hepatit C-nin müəyyənləşdirilməsi üçün dünyanın ilk sürətli testini qeydiyyatdan keçiriblər.

Yeni testin köməyi ilə virusun mövcudluğunu cəmi 25–30 dəqiqə ərzində müəyyənləşdirmək mümkündür. Halbuki, ənənəvi üsullarla bu proses 1,5–2 saat vaxt aparır. Rospotrebnadzor qeyd edib ki, belə sürətli diaqnostika üsulu kütləvi skrininq tədbirlərində, xəstələrin vaxtında aşkarlanmasında, effektiv müalicənin təyinində və epidemiya əleyhinə tədbirlərin görülməsində böyük əhəmiyyət daşıyır.

Qurum həmçinin xatırladıb ki, hepatit C qaraciyərdə ciddi zədələnmələrə, o cümlədən xərçəngə və sirroza səbəb ola bilən yoluxucu xəstəlikdir. İnfeksiya qan vasitəsilə ötürülür və xüsusilə immun sistemi zəif olan şəxslər bu virusa qarşı daha həssas hesab olunur.