Bir dəfəlik qabların istehsalında istifadə olunan materiallar qida məhsulları ilə qısamüddətli təmas üçün nəzərdə tutulub və onların kimyəvi sabitliyi uzunmüddətli saxlanmaya uyğun deyil.

Azmedinfo.az xəbər verir ki, "RT" jurnalınaə açıqlamasında Rusiya Texnoloji Universitetinin (RTU MIREA) qeyri-üzvi kimya kafedrasının dosenti Andrey Doroxov bildirib ki, belə plastiklərin hazırlanmasında elastiklik, möhkəmlik və rəng üçün müxtəlif kimyəvi maddələr əlavə olunur.

Onun sözlərinə görə, bu cür qabda yemək uzun müddət saxlanıldıqda, xüsusilə də isti, yağlı və ya turş qidalar (məsələn, şorba, sous və ya marinad) yerləşdirildikdə, həmin maddələr ərzağa keçməyə başlayır. Bu birləşmələr arasında insanın hormonal sisteminə mənfi təsir göstərə bilən ftalatlar və bisfenol A da ola bilər. Doroxovun qeyd etdiyinə görə, bu maddələrin real səviyyəsi icazə verilən normadan xeyli çox ola bilər.

Mütəxəssis həmçinin melamin qabların da təhlükə yaratdığını vurğulayıb. Onlar keramika kimi görünsə də, isti ilə təmas zamanı formaldehid adlı son dərəcə zəhərli və kanserogen maddə ifraz edə bilir.

Doroxovun sözlərinə görə, birdəfəlik plastik qabları yumaq da riski artırır, çünki yuyucu vasitələr və süngərlər qabın səthində mikrocızıqlar yaradır. Bu cızıqlarda bakteriyalar asanlıqla toplanır və çoxalır ki, bu da qida zəhərlənməsi təhlükəsi yaradır.

Ekspertin fikrincə, özünü qorumağın ən sadə yolu çoxdəfəlik konteynerlərdən istifadə etməkdir. Belə qablar üzərində “çəngəl və qədəh” işarəsi və “PP 5” (polipropilen – istiliyə və qidaya davamlı material) qeyd olunur. Daha təhlükəsiz variant kimi, alınan yeməyi birdəfəlik qabdan şüşə və ya keramika qabına keçirmək, onu mikrodalğalı sobada bu qabda qızdırmamaq, isti yeməklər üçün isə paslanmayan poladdan hazırlanmış termos və lənçbokslardan istifadə etmək məsləhətdir.

Doroxov yekun olaraq bildirib ki, birdəfəlik qablar rahatlıq üçün yaradılıb və onları yalnız bir dəfə və təyinatına uyğun şəkildə istifadə etmək lazımdır.