Uşaq yıxıldıqda panikaya düşmədən, əvvəlcə görünən xəsarətləri diqqətlə yoxlamaq, açıq yara, şişlik və ya göyərmə olub-olmadığını müəyyən etmək lazımdır. 

Azmedinfo.az xəbər verir ki, “Harmony Health Hospital”ın pediatrlarının bildirdiklərinə görə, uşaqların aktivliyi artdıqca yıxılmalar da təbii hal alır, lakin bu zaman valideynlərin reaksiyası vəziyyətin gedişatında həlledici rol oynayır.

Həkimlər baş travmasına da xüsusi diqqət yetirməyi məsləhət görürlər. Əgər uşaqda huş itkisi, qarışıqlıq, qusma və ya yuxululuq müşahidə edilirsə, bu, dərhal tibbi müdaxilə tələb edir. Eyni zamanda, uşağın qol və ayaqlarını sərbəst hərəkət etdirib-etdirmədiyini yoxlamaq, davranışında yuxululuq, əsəblik və ya çaşqınlıq kimi dəyişikliklər varsa, pediatra və ya travmatoloqa müraciət etmək vacibdir. Qanaxma hallarında isə təmiz parça ilə yüngül təzyiq tətbiq etmək və gecikmədən həkimə müraciət tövsiyə edilir.

Maarifləndirici qeyd

Pediatrların fikrincə, körpələr (0–6 ay) çevrilməyə başladıqda yataq və dəyişdirmə masasından yıxılma riski daşıyır. İməkləmə dövründə (6–12 ay) pilləkənlər və mebellər təhlükə mənbəyinə çevrilir. Yeni yeriməyə başlayan uşaqlar (1–3 yaş) üçün yürütəclər ciddi xəsarət riski yaradır. Məktəbəqədər dövrdə (3–7 yaş) uşaqlara təhlükəsizlik qaydaları öyrədilməli, 7–14 yaş arası dövrdə isə idman və oyun zamanı ciddi travmaların qarşısını almaq üçün valideyn nəzarəti gücləndirilməlidir.

Pediatrlar qeyd edirlər ki, düzgün və vaxtında göstərilən ilkin reaksiya uşağın sağlamlığını qorumağın ən effektiv yoludur.