Göz sağlamlığını qorumaq həyat keyfiyyətini qorumaq deməkdir

13 noyabr dünyada Beynəlxalq Gözdən Əlillər Günü kimi qeyd olunur. Bu gün cəmiyyətin diqqətini görmə qabiliyyəti məhdud olan insanların problemlərinə, onların sosial müdafiəsinə və göz sağlamlığının qorunmasının vacibliyinə yönəltmək məqsədi daşıyır.

Azmedinfo.az xəbər verir ki, Ümumdünya Səhiyyə Təşkilatının (ÜST) məlumatına görə, dünyada 2,2 milyarddan çox insan görmə pozğunluğundan əziyyət çəkir. Onların yarısında bu problemlərin vaxtında profilaktika və müalicə ilə qarşısını almaq mümkün olardı. Görmə itkisinin əsas səbəbləri arasında katarakta, qlaukoma, şəkərli diabetə bağlı retinopatiya, torlu qişa xəstəlikləri və görmə orqanının travmaları ön plandadır.

Göz sağlamlığınızı qorumaq üçün tövsiyələr:

Müntəzəm göz müayinəsi – 40 yaşdan sonra hər il, uşaqlarda isə ildə azı bir dəfə oftalmoloqa müraciət edin.

Qan təzyiqi və şəkər səviyyəsinə nəzarət – yüksək təzyiq və diabet göz dibinə ciddi zərər verə bilər.

Ekran qarşısında fasilələr – hər 20 dəqiqədən bir baxışı 20 saniyəlik uzağa yönəldin (“20-20-20” qaydası).

Gözləri ultrabənövşəyi (UV) şüalardan qoruyun – keyfiyyətli gün eynəklərindən istifadə edin.

Siqaret çəkməyin – nikotin qan dövranını zəiflədir və torlu qişanın zədələnmə riskini artırır.

Vitaminlərlə zəngin qidalanın – A, C, E vitaminləri, omeqa-3 yağ turşuları, yerkökü, ispanaq, balıq və qoz kimi qidalar göz toxumalarını möhkəmləndirir.

Təmizliyə diqqət – kontakt linzaları və makiyaj vasitələrini gigiyenik şəkildə istifadə edin.

Görmə duyğusu insanın ətraf aləmlə əlaqəsini təmin edən ən dəyərli hisslərdən biridir. Gözlərimizə düzgün qulluq etmək, müntəzəm profilaktik müayinələrdən keçmək və sağlam həyat tərzinə riayət etmək gələcəkdə bir çox göz xəstəliklərinin qarşısını ala bilər.

Görmək – nemətdir, qorumaq isə məsuliyyət.