Ürək transplantasiyası tibbin bir möcüzəsidir

14 Noyabr 2025

478

Ürək transplantasiyası tibbin bir möcüzəsidir

Ürək transplantasiyası tibbin insan həyatını xilas etmək gücünün ən parlaq nümunələrindən biridir. Bu gün minlərlə insanın həyatını xilas edən bu əməliyyat uzun və mürəkkəb elmi yolun nəticəsidir.

Azmedinfo.az xəbər verir ki, XX əsrin əvvəllərindən alimlər ürəyin başqa bədənə köçürülməsi imkanlarını araşdırmağa başladılar. 1953-cü ildə amerikalı cərrah Con Gibbon süni qan dövranı aparatını icad etdi və açıq ürək əməliyyatını uğurla həyata keçirdi. Bu, gələcək transplantasiyaların əsasını qoydu.

3 dekabr 1967-ci ildə Cənubi Afrikada Kristian Barnardın həyata keçirdiyi ilk ürək nəqli tibbin tarixində dönüş nöqtəsi oldu. Pasiyent 18 gün yaşasa da, dünya artıq bildi ki, ürək nəqli mümkündür.

Əsas maneə uzun illər orqanın immun sistem tərəfindən rədd olunması idi. 1980-ci illərdə siklosporin adlı immunosupressiv dərmanın tətbiqi bu problemi xeyli azaltdı və ürək nəqlindən sonra uzunömürlülüyü təmin etdi.

Bu ilin oktyabr ayında Azərbaycanda regionda ilk ürək transplantasiyası həyata keçirildi. Bu uğurun arxasında dəqiq koordinasiya sistemi, peşəkar tibbi komanda, müasir kliniki infrastruktur dayanır.

Meyit donordan ürək köçürülməsi ölkə səhiyyəsinin inkişafında mühüm mərhələdir. Bu əməliyyat yalnız cərrahi bacarığın deyil, həm də insanlıq, fədakarlıq və mərhəmət dəyərlərinin təcəssümüdür.

Bir insanın həyatı başqa bir insanın qəlbinin döyüntüsü ilə davam etdikdə, bu, həm təbabətin, həm də insanlığın ən yüksək zirvəsinə çevrilir.

Orqan Donorluğu və Transplantasiyası üzrə Koordinasiya Mərkəzi