2–5 yaş dövrü uşaqların həyatında həm fiziki cəhətdən, həm də zehni baxımdan inkişafın ən dinamik və həlledici mərhələsi hesab olunur. Məhz bu dövrdə formalaşan qidalanma vərdişləri onların uzunmüddətli sağlam gələcəyinin möhkəm təməlini qoyur.

Azmedinfo.az AQTA-nın məlumatına istinadən yazır ki, bu yaş qrupunda sağlam və balanslı qidalanma uşaqların inkişafına birbaşa təsir edən bir sıra mühüm funksiyaları yerinə yetirir.

Fiziki sağlamlığa təsir: Düzgün qidalanma orqanizmdə enerji balansını tənzimləyir, piylənmənin qarşısını alır və artıq çəki riskini əhəmiyyətli dərəcədə azaldır. Bu, sümüklərin, əzələlərin və bütövlükdə bütün orqanizmin sağlam böyüməsinə və fiziki inkişafının sürətlənməsinə kömək edir.

Zehni inkişafa dəstək: Keyfiyyətli qida maddələri zehni və idrak inkişafını gücləndirir. Bu, uşaqların diqqətini cəmləmə, yaddaşının formalaşması və yeni məlumatları qavrama, yəni öyrənmə qabiliyyətinin dəstəklənməsi üçün vacib şərtdir.

Azərbaycan Qida Təhlükəsizliyi Agentliyi (AQTA) bu məqsədlə həyata keçirdiyi “Sözdən əmələ keç, sağlam qidalanmanı seç!” layihəsi çərçivəsində məktəbəqədər yaşlı uşaqların sağlam böyüməsini fəal şəkildə dəstəkləməkdə davam edir. Qurum valideynləri uşaqlarının gündəlik həyatına düzgün qidalanma vərdişlərini daxil etməyə çağırır.

Unutmayaq ki, sağlam və balanslı qidalanan uşaq aktiv, düşünən və fiziki cəhətdən güclü bir gələcəyin təminatıdır.