20 Noyabr Dünya Pediatrlar Günündə uşaqların sağlamlığını qorumağa, hər bir ailəyə dəstək olmağa və ölkəmizin gələcəyini möhkəmləndirməyə ömrünü həsr edən bütün həkim-pediatrların bayramını hörmət və minnətdarlıqla qeyd edirik. Bu gün, yalnız bir peşənin bayramı deyil, həm də böyük fədakarlığın, mərhəmətin, bilik və müdrikliyin təntənəsidir.

Bu bayram xüsusilə əlamətdardır, çünki bu il həm də Azərbaycan Pediatrlar Assosiasiyasının (APA) 95 illik yubileyidir.

1930-cu ildə yaradılmış Assosiasiya ölkəmizdə pediatriya məktəbinin, elmi bazanın və müasir uşaq sağlamlığı sisteminin formalaşmasının əsasını qoydu. Məhz Assosiasiyanın təşəbbüsləri ilə aşağıdakı mühüm addımlar atıldı:

İlk pediatriya məktəbi və universitet kafedrası yaradıldı;

İlk peyvənd təqvimi formalaşdırıldı;

İlk milli dərsliklər və metodik vəsaitlər yazıldı;

Ölkənin uşaq sağlamlığına yönəlik bir çox əsas elmi və tədris layihələri həyata keçirildi.

1993-cü ildə ümummilli lider Heydər Əliyevin, Azərbaycanın pediatriya elminin banilərindən olan akademik Adilə Namazovanın və Türkiyənin tanınmış alimi professor İhsan Doğramacının təşəbbüsü ilə Assosiasiya dünyanın aparıcı pediatrik təşkilatlarına üzv oldu. Bu addım Azərbaycanın beynəlxalq elmi arenaya çıxışında mühüm dönüş nöqtəsi oldu.

İllər ərzində Assosiasiya ölkəmizin ilk dövlət mükafatı laureatlarını yetişdirdi, Elm İnkişafı üzrə Avropa medalı, Uşaqların Sağlamlığının Qorunması üzrə Avrasiya medalı, beynəlxalq pediatrik cəmiyyətlərin və elmi qurumların çoxsaylı təşəkkür və mükafatlarını qazandı. Bu uğurlar Assosiasiyanın güclü elmi potensialının və ictimai əhəmiyyətli missiyasının bariz göstəricisidir.

Bu xüsusi gündə beynəlxalq tərəfdaşlarımıza — IPA, EPA, WHO, UNICEF, UNESCO və digər nüfuzlu təşkilatlara dərin təşəkkürümüzü bildiririk. Uşaq sağlamlığının qorunması, elmi əməkdaşlığın genişləndirilməsi və qlobal təşəbbüslərin dəstəklənməsində verdiyiniz töhfə bizim üçün son dərəcə qiymətlidir.

Əziz pediatrlar, Siz uşaqların səsi, ailələrin dayağı, gələcəyin qoruyucularısınız. Sizin fədakarlığınız, bilik və mərhəmətiniz sayəsində dünya daha sağlam, daha işıqlı və daha güvənli olur.

Bu əlamətdar gün və Azərbaycan Pediatrlar Assosiasiyasının şanlı 95 illik yubileyi münasibətilə hər birinizi təbrik edir, yeni nailiyyətlərə ruhlanmağınızı və uşaqların sağlam gələcəyi naminə birliyimizin daha da güclənməsini arzulayırıq.