Şirvan, Neftçala və Qobustanda 29 mindən çox uşaq icbari dispanserizasiyaya cəlb olunub

24 Noyabr 2025

432

TƏBİB “Uşaqların icbari dispanserizasiyadan keçirilməsinə dair Dövlət Proqramı”nın təmin edilməsi istiqamətində tədbirləri davam etdirir.

Dövlət Proqramına uyğun olaraq cari ilin yanvar-oktyabr ayları ərzində Şirvan şəhərində, Neftçala və Qobustan rayonlarında 29 034 uşaq icbari dispanserizasiyaya cəlb olunub.

Belə ki, Neftçala Rayon Mərkəzi Xəstəxanasının tibb heyəti tərəfindən 15 500, Şirvan Şəhər Mərkəzi Xəstəxanasının tibb heyəti tərəfindən 11 816 nəfər, Qobustan Rayon Mərkəzi Xəstəxanasının tibb heyəti tərəfindən isə 1 718 uşaq müayinə olunub. Xəstəlik aşkarlanan uşaqlarla bağlı məlumatlar həm məktəb rəhbərliyinə, həm də valideynlərə təqdim edilib. Həmin şagirdlərin qısa zamanda ilkin səhiyyə xidməti göstərən tibb müəssisələrinə müraciət edərək geniştərkibli müayinələrdən keçməsi və aşkarlanan xəstəliklərin müalicəsinə başlanması tövsiyə olunub.

Qeyd edək ki, uşaqların icbari dispanserizasiyası Azərbaycan Respublikasının Prezidentinin 5 mart 2013-cü il Fərmanına uyğun olaraq davam etdirilir.

İcbari dispanserizasiyasının əsas məqsədi uşaqlar, o cümlədən məktəblilər arasında xəstələnmə, sağlamlıq imkanlarının məhdudluğunun və ölüm səviyyəsinin azaldılmasıdır.

İcbari dispanserizasiya zamanı uşaqlara illik profilaktik baxış həyata keçirilir. İcbari dispanserizasiya çərçivəsində uşaqlar hər il bir və ya bir neçə ixtisas üzrə mütəxəssislər (pediatr, stomatoloq, nevroloq, cərrah, endokrinoloq, uroloq, oftalmoloq, otorinolarinqoloq, dermatoloq və digər mütəxəssislər) tərəfindən diaqnostik və laborator müayinələrə cəlb edilir.