Yaponiya hökuməti cümə günü bildirib ki, ölkə üzrə seçilmiş səhiyyə müəssisələrində orta hesabla qeydə alınan qrip xəstələrinin sayı son 10 ildə görünməmiş sürətlə xəbərdarlıq səviyyəsinə çatıb. Bəzi mütəxəssislər epidemiyanın adi vaxtdan daha tez yayılmasının mümkün səbəblərindən biri kimi turist axınının artmasını göstərir.

Azmedinfo.az "Japan today"ə istinadən yazır ki, Səhiyyə, Əmək və Rifah Nazirliyinə görə, son 10-15 gündə 3000 müəssisədə 145 526 xəstə qeyd edilib. 

Nazirliyə görə, ən çox yayılan virus 2023-cü ilin qışında geniş görülen A tipli Honq-Konq virusudur.

Niigata Universitetinin professoru Reyko Saito bildirib ki, bu virus növü avqust–sentyabr aylarında Honq-Konq və Tayvanda dolaşırdı və bu bölgələrdən Yaponiyaya səfər edən turist sayının artması virusun sürətlə yayılmasına əsas vermiş ola bilər.

O, infeksiyalardakı kəskin artımın digər mümkün səbəbləri arasında “temperaturun sürətlə düşməsi, zəif havalandırma və həddindən artıq temperatur dəyişiklikləri”nin olduğunu deyib.

Hazırda epidemiya əsasən uşaqlar və tələbələr arasında müşahidə olunur, lakin ilin sonuna doğru insanların daha çox yer dəyişdirəcəyi üçün yoluxmuş böyüklərin sayının artacağı gözlənilir.

Prefekturalar arasında ən yüksək göstərici Yaponiyanın şimal-şərqində yerləşən Miyagi prefekturasında — 80,02 olub. Onu ardıcıl olaraq Saytama (70,01) və Fukusima (58,54) izləyib.

Ümumilikdə Şərqi Yaponiyada artım daha sürətli olsa da, ən aşağı göstəricilər Koti, Tokuşima və Kaqoşima prefekturalarında qeydə alınıb.

Epidemiya səbəbilə ümumilikdə 5777 ibtidai, orta və lisey məktəbi tam və ya qismən bağlanıb; bu rəqəm əvvəlki həftədən təxminən 2000 məktəb daha çoxdur.