Valideynlərin humanizm dərsi

01 Dekabr 2025

372

11 aylıq körpə Duru üçün adi bir gün bir anda faciəyə çevrildi. Yatağında üzü üstə dönərək nəfəs ala bilməyən körpənin ürəyi dayandı. Ailə dərhal onu xəstəxanaya çatdırdı. Sürətli tibbi müdaxilə ilə Durunun ürək döyüntüləri bərpa edilsə də, vəziyyəti kritik olaraq qalırdı.

Azmedinfo.az orqan donorluğunun əhəmiyyətini vurğulayan hekayəyə diqqət çəkib:

Reanimasiya şöbəsində bir ay boyunca körpə Durunun müalicəsi aparıldı. Amma həkimlərin bütün səylərinə baxmayaraq, onun həyatını xilas etmək mümkün olmadı və beyin ölümü baş verdi. Ata-ana insanpərvər bir qərar verdilər- qızlarının orqanlarını bağışladılar.

“Dörd ildir evliyik və Duru ilk övladımız idi. Qızımızı xilas etmək mümkün olmadı, amma həyat uğrunda mübarizə aparan başqa körpələr gözümüzün önünə gəldi. Biz də eyni vəziyyətdə ola bilərdik. Empati hissi ilə bu qərarı verdik. Durunun ürəyi 2 yaşlı bir qızcığaza köçürüldü. Mən qızımın bədənini torpağa verdim, amma bədənindən bir parçanın başqa uşaqlara ümid olub onları yaşatması bizə təsəlli verdi. Bu addımın başqalarına da nümunə olmasını istəyirik”, - deyə ata danışır.

Beləcə, cəmi 11 ay yaşayan Duru, ölümündən sonra böyük bir miras qoydu- dörd uşağı yaşadan həyat mirası.

Qeyd edək ki, bu hadisə 2024-cü ildə Türkiyənin Konya vilayətində qeydə alınıb.

Orqan Donorluğu və Transplantasiyası üzrə Koordinasiya Mərkəzi