Britaniya Tibb Assosiasiyası (BMA) maaşla bağlı uzunmüddətli mübahisə fonunda İngiltərədə yeni tətil dalğası elan etdiyini bildirib.

Azmedinfo.az BBC-yə istinadən yazır ki, “Rezident həkimlər” adlanan tibb işçiləri 17 dekabrdan etibarən beş gün müddətinə işə çıxmayacaqlar.

Bu, 2023-cü ilin martından bəri həkimlər ittifaqının keçirdiyi 14-cü tətil olacaq və xüsusilə xəstəxanalarda ciddi pozuntulara səbəb olacağı gözlənilir.

Milada hazırlıq dövrü hər zaman çətin olduğundan bu addım BMA tərəfindən atılan “qızışdırıcı əməl” kimi qiymətləndirilir.

Rezident həkimlər tibbi işçi qüvvəsinin təxminən yarısını təşkil edir və universiteti yenicə bitirmiş həkimlərdən tutmuş on ilə qədər təcrübəsi olanlara qədər müxtəlif qrupları əhatə edir. Onlar həm təcili, həm də planlı tibbi xidmətlərdən imtina edəcəklər, boşluqları doldurmaq üçün isə təcrübəli (böyük) həkimlər cəlb olunacaq.

Aksiya hökumətlə ittifaq arasında danışıqların pozulmasından sonra başlayıb.

Hökumət həkimlərə daha çox təlim yeri açılmasını, iş şəraitinin yaxşılaşdırılmasını və imtahan ödənişləri kimi cibxərclərinə yardım göstərilməsini nəzərdə tutan təklif irəli sürmüşdü. Lakin BMA bu təklifi rədd edib və hər hansı razılaşmanın maaş artımını da ehtiva etməli olduğunu bildirib.