Rusiyada yaradılmış innovativ görmə neyroimplantının klinik sınaqları davam edir. Bu sınaqlar Tibbi Primatologiya Elmi-Tədqiqat İnstitutunda aparılıb.

Azmedinfo.az "Gazeta" nəşrinə istinadən yazır ki, 2022-2025-ci illərdə alimlər meymunlar üzərində çoxsaylı əməliyyatlar həyata keçiriblər. Sınaqlar göstərib ki, elektronika beyinə yerləşdirildikdən sonra meymunlar gözləri bağlı olsa da, obyektləri ayırd edə biliblər.

Bu cihaz üç əsas hissədən ibarətdir: görüntünü çəkən kamera, məlumatı emal edən mini-kompüter və beyinə implantasiya olunan hissə. İmplant sayəsində görmə qabiliyyəti olmayan insanlar obyektlərin konturlarını, işığı və hərəkəti fərqləndirə biləcəklər. Ən əsası, bu cihaz gözlərin iştirakı olmadan belə görməni bərpa edir.

Hazırda dünyada bu mərhələdən keçmiş analoji bir məhsul yoxdur. Rusiyada hazırlanan bu implantın demək olar ki, bütün hissələri yerli istehsaldır. Cihazın 2028-2029-cu illərdə bazara çıxarılması nəzərdə tutulur. Planlaşdırılır ki, əməliyyatların çoxu pasiyentlər üçün pulsuz olacaq.

Bu texnologiya, xüsusilə kor uşaqları olan valideynlər üçün böyük bir ümid mənbəyidir. Əlavə olaraq, şirkət artıq dərin eşitmə itkisi olan xəstələr üçün nəzərdə tutulmuş koxlear implant da hazırlayıb.