Tükbaş qurdlar, elmi adı ilə Trichuris trichiura, bağırsaqda parazitlik edən helmintlərdir.

Azmedinfo.az xəbər verir ki, V.Y. Axundov adına Elmi-Tədqiqat Tibbi Profilaktika İnstitutunun məlumatına əsasən, bu qurdlar nazik baş və qalın quyruq hissəsinə malikdirlər, uzunluqları 3-5 sm-ə çatır və baş hissələri ilə bağırsağın selikli qişasına yapışaraq qidalanırlar. Onlar parazitlər kor bağırsaqda, bəzən isə bütün yoğun bağırsaqda yerləşə bilər.

Ən maraqlı məqam odur ki, onlar 5-6 il boyunca heç bir simptom vermədən insan orqanizmində yaşaya bilirlər. Xəstəlik əlamətləri özünü qarın ağrısı və narahatlığı, uşaqlarda iştahsızlıq və böyümə gecikməsi kimi göstərir. Xroniki yoluxmalar nəticəsində qan azlığı və yorğunluq yarana, bağırsaq selikli qişasında iltihab səbəbindən qəbizlik və ya ishal müşahidə oluna bilər.

Yoluxma adətən torpaq vasitəsilə baş verir. Çirkli əllər, yuyulmamış meyvə və tərəvəzlər, həmçinin çirkli şərait gigiyena qaydalarına əməl olunmadıqda yoluxmaya şərait yaradır. Tükbaş qurdlarla yoluxmanın qarşısını almaq üçün əsas profilaktik tədbirlər arasında yeməkdən əvvəl və sonra əllərin düzgün yuyulması, meyvə və tərəvəzlərin yaxşı yuyulması, vaxtaşırı tibbi müayinə və laborator analizlərin aparılması və uşaqlara gigiyenik davranışların öyrədilməsi yer alır.