Fransada 22,7 milyon mRNA peyvəndli və 5,9 milyon peyvəndsiz fərdi əhatə edən bir araşdırma, peyvənd edilmiş şəxslərin COVID-19-dan ölüm riskinin %74 daha aşağı olduğunu və dörd illik bütün səbəblərdən ölümlə əlaqədar riskdə artım olmadığını ortaya qoyaraq, mRNA peyvəndlərinin təhlükəsizliyini vurğuladı.

Azmedinfo.az "JAMA Network"ə istinadən yazıb ki, COVID-19 peyvəndinin qısamüddətli ölüm səviyyəsinə təsirini qiymətləndirən bir çox araşdırma aparılsa da, xüsusilə SARS-CoV-2 infeksiyasından sonra ağır xəstəlik keçirmə ehtimalı daha az olan gənc şəxslərdə, uzunmüddətli ölüm səviyyəsini peyvənd vəziyyətinə görə müqayisə edən bir araşdırma aparılmamışdı. Fransada aparılan bu araşdırmada, COVID-19 mRNA peyvəndi ilə peyvəndlənmiş 18-59 yaş arası fərdlərlə peyvəndlənməmiş fərdlərin dörd illik bütün səbəblərdən ölümlə əlaqədar səviyyəsini müqayisə etmək məqsədi güdülmüşdür.

Bu milli kohort (qrup) araşdırmasında, 1 noyabr 2021-ci il tarixində həyatda olan 18-59 yaş arası bütün Fransa əhalisini əhatə edən Fransa Milli Sağlamlıq Məlumat Sistemi verilərinə istinad edilmişdir. Veri təhlili 2024-cü ilin iyun ayı ilə 2025-ci ilin sentyabr ayı arasında həyata keçirilmişdir.

Cəmi 22 767 546 peyvəndlənmiş və 5 932 443 peyvəndlənməmiş fərd, təxminən 45 ay ərzində izlənildi. Peyvəndlənmiş fərdlər peyvəndlənməmişlərdən daha yaşlı idi; əksəriyyəti qadın idi və daha çox kardiometabolik komorbiditələrə (müşayiət edən xəstəliklərə) malik idilər. İzləmə dövründə, peyvəndlənmiş və peyvəndlənməmiş qruplarda müvafiq olaraq 98 429 (%0,4) və 32 662 (%0,6) bütün səbəblərdən ölüm baş verdi. Peyvəndlənmiş fərdlərdə ağır COVID-19-dan ölüm riski %74 daha aşağı, bütün səbəblərdən ölümlə əlaqədar risk isə %25 daha aşağı tapıldı. Ağır COVID-19 ilə əlaqədar ölüm istisna edildikdə də oxşar bir əlaqə müşahidə edildi. Həssaslıq təhlili, peyvəndlənmiş şəxslərin ölüm riskinin səbəbindən asılı olmayaraq davamlı olaraq daha aşağı olduğunu ortaya qoydu. COVID-19 peyvəndindən sonra ilk altı ay ərzində ölüm səviyyəsi isə %29 daha aşağı müəyyən edildi.

Təxminən 28 milyon nəfəri əhatə edən milli kohort araşdırmasında, COVID-19-a qarşı peyvəndlənmiş 18-59 yaş arasındakı fərdlərdə dörd illik hər hansı bir ölümlə əlaqədar riskdə artım olmadığı müəyyən edilmişdir. Tapıntılar, dünya miqyasında geniş istifadə olunan mRNA peyvəndlərinin təhlükəsiz olduğunu dəstəkləyir.