Azmedinfo.az xəbər verir ki, Kliniki Tibbi Mərkəzin Urologiya şöbəsinin həkim-uroloqu İsmayıl Hüseynovun sözlərinə görə, böyrək daşı xəstəliyi uroloji xəstəliklər arasında ilk üçlükdə yer alır və ölkəmizdə hər yaş qrupunda müşahidə olunur.

 

"Böyrək daşları adətən sidiyin tərkibindəki kalsium, oksalat və sidik turşusu kimi maddələrin normadan artıq olması və ya sidiyin kifayət qədər duru olmaması nəticəsində yaranır. Buna az su içmək və susuz qalmaq, isti iqlim və çox tərləmə, sidik yollarında infeksiyalar, irsi meyillilik, hərəkətsiz həyat tərzi və bəzi dərmanların uzunmüddətli qəbulu səbəb ola bilər", - deyə həkim qeyd edib.

 

Ekspert bildirib ki, böyrək daşı xəstəliyinin ən çox rast gəlinən əlaməti bel və yan nahiyədə başlayan, qasıq nahiyəsinə yayılan və şiddəti artıb-azalan ağrılardır. Bu tip ağrı “renal kolika” adlanır və xəstələrdə çox vaxt güclü olur. Böyrək daşı diaqnozu ultrasəs müayinəsi, kompüter tomoqrafiyası və laborator analizlərin birgə qiymətləndirilməsi ilə qoyulur.

 

Həkim böyrək daşının müalicə üsullarından da danışıb: "Böyrək daşının müalicəsi bir sıra faktorlardan asılı olaraq fərqlənir. Böyrək daşının müalicəsi daşın yerləşdiyi yerinə, ölçüsünə, böyrəkdə genişlənmə yaratmasına, böyrək funksiyasına təsirinə və infeksiya olub-olmamasına əsasən planlaşdırılır. Müəyyən ölçüdən böyük olan, tibbi müalicəyə baxmayaraq özü düşməyən daşlarda və ya ağrısı nəzarət altına alınmayan xəstələrdə isə təcili müdaxilə tələb oluna bilər."

Sonda həkim vurğulayıb ki, böyrək daşı xəstəliyindən qorunmaq üçün həyat tərzinə diqqət etmək vacibdir. Vaxtında diaqnoz və müdaxilə ağır fəsadların qarşısını almağa kömək edir.