İnfeksiya xəstəlikləri üzrə mütəxəssis Dr. Sonqül Özer mutasiyaya uğramış H3N2 qripi (İnfluenza) virusunun daha sürətlə yayıldığı barədə xəbərdarlıq edərək, peyvəndin ən təsirli qorunma yolu olduğunu bildirdi.

Azmedinfo.az "Yeni Şafak" nəşrinə istinadən xəbər verir ki, ekspert H3N2-nin yüksək dərəcədə yoluxucu olduğunu və həm heyvanlarda, həm də insanlarda infeksiya yaratma potensialına malik olduğunu qeyd etdi.

İnfluenza A viruslarının sürətli mutasiya qabiliyyəti sayəsində virüsün immun sistemi tərəfindən tanınması çətinləşir və bu da hər il yeni qrip epidemiyasının yaranmasına səbəb olur. Yeni virus tənəffüs yollarına təsir edir və qızdırma, əzələ ağrısı, yorğunluq kimi simptomlara yol açır.

Həkim bildirdi ki, bu yeni virus variantı yayda Avstraliyada, Cənub Yarımkürəsində ortaya çıxıb, payız və qışda isə Yaponiya, ABŞ, Kanada, İngiltərə və digər Avropa ölkələrində yayılmağa başlayıb. Mütəxəssis, bu vəziyyətin yalnız Avropa ilə məhdudlaşmayacağı və bütün dünyaya yayıla biləcəyi barədə xəbərdarlıq etdi. Əvvəllər məlum olan H3N2 ilə müqayisədə, bu ilki variant bir az daha sürətli yayılır. Bildirilən halların əksəriyyəti yüngül yuxarı tənəffüs yolu infeksiyası şəklində olsa da, uşaqlarda daha tez-tez rast gəlinir və xroniki xəstəliyi olan risk qruplarında pnevmoniya (sətəlcəm) kimi ağır fəsadlara səbəb ola bilər.

Dr. Sonqül Özer bildirdi ki, müalicənin əsasını bol maye qəbulu, yataq istirahəti və simptomları yüngülləşdirmək üçün ağrıkəsicilərdən istifadə təşkil edir. Yüksək risk qrupunda olanlarda və ya ağır hallarda həkim məsləhəti ilə antiviral dərmanlar istifadə edilə bilər. Qorunmanın ən təsirli yolu isə peyvənndir və virus tez-tez mutasiyaya uğradığı üçün peyvəndin hər il təkrarlanması tövsiyə olunur. Əl gigiyenası, birdəfəlik salfetlərdən istifadə və xəstə şəxslərlə yaxın təmasdan qaçınmaq da yoluxmanın qarşısını almaqda əsas addımlardır.

İnfluenza A viruslarının bir alt qrupu olan H3N2, həm heyvanlarda, həm də insanlarda infeksiya yaratma potensialına malikdir. Həkim H3N2-nin yüksək dərəcədə yoluxucu, daha çox mövsümi qrip olaraq bilinən xəstəliyə səbəb olan viral alt tip olduğunu bildirdi.