İqlim alimləri xəbərdarlıq ediblər ki, Yerin temperaturu daha bir neçə dərəcə yüksələrsə, bu, ciddi nəticələrə gətirib çıxaracaq.

Azmedinfo.az "Nature Reviews Earth and Environment" (NREE) jurnalında dərc olunan məqaləyə istinadən yazır ki, istilər geniş əraziləri yaşayış üçün yararsız hala gətirərək milyonlarla insanı risk altında qoya bilər. London Kral Kollecinin Tom Metyusun rəhbərlik etdiyi klimatoloqların gəldiyi nəticələr belədir. 

Alimlərin fikrincə, günəşdə uzun müddət qalmaq xüsusilə yaşlı insanlar üçün ölümcül olacaq. Hətta iki dərəcə temperaturun artması ilə belə, quruda risk zonası 60 yaşdan yuxarı insanlar üçün 21%-dən 35%-ə qədər genişlənəcək. Əgər istiləşmə dörd dərəcəyə çatarsa, torpaqların təxminən 40%-i yaşayış üçün yararsız olacaq.

Hazırda istidən ən çox əziyyət çəkən insanlar Ərəbistan yarımadasının, Fars körfəzinin, Hind-Qanq düzənliyinin, eləcə də Amerikanın cənub bölgələrinin və Meksikanın sakinləridir.

Fəlakətdən qaçmağın yeganə yolu qlobal istiləşməni yavaşlatmaqdır, lakin hələ ki, effektiv həll yolları yoxdur. Bu prosesi tamamilə dayandırmaq mümkün deyil, lakin riskləri azaltmaq mümkündür. Alimlər istixana qazı emissiyalarının azaldılmasını və karbonu uda bilən təbii ekosistemlərin qorunmasını təklif edirlər.