Psoriaz və ya pullu dəmrov dərinin genetik amillərə bağlı olan, yoluxucu olmayan xroniki avtoimmun xəstəliyidir. Bu zaman xəstənin immun hüceyrələri dəriyə hücum edərək iltihabi reaksiyalara, nəticədə isə dəridə qaşıntılı qabıqlanma və ya irincikli qabarcıqlara səbəb olur.

Azmedinfo.az mütəxəssislərin rəyinə əsasən xəbər verir ki, xəstəlik istənilən yaşda yarana bilsə də, bir qayda olaraq uşaqlıq dövründən başlayır.

Stress, müxtəlif infeksiyalar, travmalar və bəzi dərman preparatları psoriazın kəskinləşməsinə təkan verən əsas faktorlardır. Xəstəliyin ən ağır forması olan pustulyar psoriaz zamanı irincikli qabarcıqlar bütün bədənə yayıla bilər ki, bu da xəstə üçün ölümcül təhlükə yaradır.

Düzgün diaqnoz yalnız peşəkar dermatoloq tərəfindən klinik əlamətlərə əsasən qoyulmalıdır. Psoriaz digər dəri xəstəlikləri ilə asanlıqla qarışdırıla bildiyi üçün yanlış müalicələrdən qaçmaq məqsədilə dəri biopsiyası üsulundan istifadə edilməsi tövsiyə olunur.