Qaraciyər yağlanması (hepatoz) qaraciyər hüceyrələrində yağın normadan artıq toplanması ilə xarakterizə olunan ciddi bir metabolik pozuntudur.

Azmedinfo.az xəbər verir ki, qastroenteroloq, hepatoloq, invaziv endoskopist Dr. Aqil Ağakişiyevin sözlərinə görə, bu vəziyyət yalnız artıq çəkili insanlarda deyil, normal bədən çəkisinə malik şəxslərdə də geniş şəkildə müşahidə oluna bilər. Xəstəliyin yaranma səbəbləri arasında maddələr mübadiləsinin pozulması, qeyri-sağlam qidalanma və fiziki passivlik xüsusi yer tutur. Xəstəlik vaxtında müalicə olunmayıb irəlilədikcə qaraciyər toxumasında iltihab və fibroz, yəni toxuma sərtləşməsi baş verir ki, bu da uzun müddət davam etdikdə sirroz kimi geri dönməz və ağır fəsadlar yarada bilər.

Təbabətdə qaraciyər yağlanması iki əsas formada təsnif olunur. Bunlardan birincisi uzun müddət və çox miqdarda alkoqol qəbulu nəticəsində yaranan spirtli qaraciyər yağlanması, ikincisi isə əsasən insulin müqaviməti, piylənmə, yanlış qidalanma və hərəkətsiz həyat tərzi ilə əlaqələndirilən spirtsiz qaraciyər yağlanmasıdır (NAFLD).

Qaraciyərin funksional sağlamlığını qorumaq üçün balanslı qidalanma, müntəzəm fiziki aktivlik və alkoqoldan uzaq durmaq ən vacib profilaktik tədbirlər hesab edilir.