Azərbaycanın ilk milli pediatrik internet portalı “Pediatriya.az” artıq 8 illik inkişaf yolunu uğurla geridə qoyub. Portalın yaradılmasında əsas məqsəd uşaqların sağlamlığı ilə bağlı ailələrə dəqiq, düzgün və maarifləndirici tibbi məlumatların təqdim olunması, müasir tibbi biliklərin sadə və anlaşıqlı dildə geniş ictimaiyyətə çatdırılmasıdır.

Azmedinfo.az xəbər verir ki, bu sözləri AZƏRTAC-a açıqlamasında portalın təsisçisi, K.Y.Fərəcova adına Elmi-Tədqiqat Pediatriya İnstitutunun və Azərbaycan Tibb Universitetinin əməkdaşı, həkim-neonatoloq Nərmin Əzizova deyib.

O qeyd edib ki, platformanın missiyası 8 ildir dəyişməz qalıb və əsas məqsəd valideynlərə etibarlı tibbi biliklərin çatdırılmasıdır: “Bu illər ərzində məqsədimiz valideynlərə, səhiyyə işçilərinə dəqiq və elmi əsaslı məlumatlar təqdim etmək, yanlış məlumatların qarşısını almağa dəstək olmaqdır. Hazırda isə portalın sosial şəbəkələrdə on minlərlə izləyicisi var. Fəaliyyət göstərdiyi illər ərzində 100-dən çox elmi-publisistik məqalə və 5 mindən artıq maarifləndirici material geniş auditoriyaya təqdim edilib”, - deyə həkim-neonatoloq vurğulayıb.

N.Əzizova tibbi maarifləndirmənin hər kəs üçün vacib olduğuna diqqət çəkib: “Ölkədə ana və uşaq sağlamlığına yönəlmiş dövlət siyasəti bu sahədə maarifləndirici təşəbbüslərin genişlənməsinə mühüm dəstək verir. Doğru tibbi biliklərin cəmiyyətə çatdırılması yalnız peşəkar məsuliyyət deyil, həm də sosial öhdəlikdir. Tibbin digər sahələrində də maarifləndirici fəaliyyətin genişlənməsi cəmiyyət üçün böyük fayda gətirə bilər və bu prosesə müxtəlif ixtisaslı həkimlərin qoşulması arzuolunandır. Həkimlərin sosial şəbəkələrdə və ictimai müstəvilərdə paylaşdıqları məlumatlar cəmiyyətin sağlamlıq savadına birbaşa təsir göstərir. Peşəkarların tibbi bilikləri maarifləndirici formada paylaşması həm cəmiyyət üçün faydalı olur, həm də həkimlərə etimadı gücləndirir”.

O, valideynlərə tövsiyə edərək bildirib ki, uşaqların sağlamlığının qorunmasında vaxtında peyvəndlənmə və profilaktik tibbi müayinələr mühüm rol oynayır. “Etibarlı tibbi mənbələrə istinad edilməsi, peyvənd qrafikinin izlənilməsi və uşaqların vaxtında tibbi müayinələrə cəlb olunması sağlam nəslin formalaşmasında önəmli amillərdir”, - deyə N.Əzizova əlavə edib.