Həkim-dietoloq Yelena Solomatina qış aylarında iştahanın artmasının səbəblərini izah edərək, günlərin qısalmasını, yuxusuzluğu və stresi yüksək kalorili qidalara meylliliyi artıran əsas amillər kimi qeyd edib.

Azmedinfo.az "Gazeta" nəşrinə  istinadən xəbər verir ki, həkimin bildirdiyinə görə, soyuq fəsillərdə orqanizm bədən temperaturunu sabit saxlamaq üçün daha çox enerji sərf edir, bu da təbii olaraq şorba və sıyıq kimi qidalı və isidici yeməklərə olan tələbatın artmasına gətirib çıxarır. Gün işığının müddətinin azalması qalxanvari vəzin fəaliyyətinə və D vitamininin sintezinə təsir edərək ümumi əhval-ruhiyyəyə və enerji səviyyəsinə mənfi təsir göstərir. Nəticədə, insan çox vaxt yeməyi bir zövq alma vasitəsi kimi görür, zəncəfil və istiot kimi kəskin ədviyyatların əlavə edilməsi isə iştahanı daha da stimullaşdırır.

Dietoloq qeyd edib ki, yüksək kalorili qidalara olan həvəs yuxu çatışmazlığı və gündəlik rejimin pozulması ilə daha da kəskinləşir. O, iştahanı stabilləşdirmək üçün qidalanma qrafikini qaydaya salmağı, səhəri zülalla zəngin səhər yeməyi ilə açmağı və müntəzəm olaraq təmiz havada gəzməyi tövsiyə edib.

Həkim bayram rasionu ilə bağlı fikirlərini bölüşərkən əlavə edib ki, "Paytaxt" (olivye) kimi ənənəvi salatları yalnız təzə hazırlandığı təqdirdə yemək doğru olar. Mayonezli salatlar süfrəyə verilməzdən dərhal əvvəl hazırlanmalı və altı saatdan çox saxlanılmamalıdır. O, həmçinin duz və yağla zəngin olan hisə verilmiş məhsulların və kolbasaların qədərinə diqqət yetirməyi məsləhət görüb. Ekspertlər bu növ qidaları menyudan tamamilə çıxarmağı deyil, onları isti yeməklər və tərəvəzlərlə balanslaşdırılmış şəkildə istehlak etməyi tövsiyə edirlər.