Beyin ölümünün təsdiqlənmə prosesi çox ciddi, mərhələli və şəffaf tibbi qaydalara əsaslanır.

Azmedinfo.az Orqan Donorluğu və Transplantasiyası üzrə Koordinasiya Mərkəzinin məlumatına əsasən xəbər verir ki, ilk növbədə xəstədə dərin koma və beyin fəaliyyətinin dayanmasına dair klinik şübhələr yaranmalı, kəllə-beyin travması və ya qanama kimi səbəblər dəqiq bilinməlidir.

Daha sonra həkimlər beyin ölümünü təqlid edə bilən dərman təsiri, bədən temperaturunun aşağı olması və ağır zəhərlənmə kimi geri dönə bilən halları istisna edirlər. Bunun ardınca aparılan klinik nevroloji müayinə zamanı ağrıya reaksiya, göz bəbəklərinin işığa cavabı və beyin kötüyü reflekslərinin tam itməsi yoxlanılır. Növbəti mərhələdə apnoe testi icra edilir və süni tənəffüs kəsildikdə xəstənin öz-özünə nəfəs almadığı təsdiqlənir. Ehtiyac yarandıqda beyin elektrik aktivliyini və qan dövranını yoxlayan EEG və Doppler kimi köməkçi instrumental müayinələr aparılır.

Bütün bu nəticələr reanimatoloq, nevropatoloq və ya neyrocərrahdan ibarət həkim komissiyası tərəfindən qiymətləndirilir və ölüm rəsmi şəkildə təsdiqlənir. Sonda etik və hüquqi mərhələyə uyğun olaraq ailəyə məlumat verilir və yalnız onların razılığı ilə orqan donorluğu məsələsi müzakirə edilir.

Unutmaq olmaz ki, beyin ölümü sadəcə ağır koma deyil, geri dönməz bioloji ölümdür.