Gözdə problem yaradan düyünlər – Xalazion nədir? - Oftalmoloqlar izah etdi

06 Yanvar 2026

388

Gözdə problem yaradan düyünlər – Xalazion nədir? - Oftalmoloqlar izah etdi

Xalazion göz qapağındakı piy vəzilərinin tutulması nəticəsində yaranan düyündür. Bu xəstəlik müxtəlif səbəblərdən meydana gələ bilir.

Azmedinfo.az TƏBİB-əistinadən yazır ki, Mərkəzi Neftçilər Xəstəxanasının həkim-oftalmoloqu Aytəkin İbrahimxəlilovanın sözlərinə görə, xalazion çox zaman digər oftalmoloji xəstəliklərlə qarışdırılır, lakin xalazion daha uzunmüddətli gedişata malikdir: “Bir sıra göz xəstəliklərindən sonra soyuqdəymə, immunitetin kəskin zəifləməsi, hormonal pozulmalar, allergik reaksiyalar, yağlı dəri tipi və göz qapağı gigiyenasına laqeyd yanaşma xalazionun əmələ gəlməsinə şərait yaradır.

Xəstəlik, adətən, göz qapağında diskomfort, qaşınma və zəif ağrı ilə başlayır. Bir neçə gündən sonra göz qapaqlarında şişkinlik əmələ gəlir və təxminən bir həftə ərzində yaranmış düyünün aktiv böyüməsi müşahidə olunur. Xalazion çox vaxt bir-iki həftə ərzində böyüyür, daha sonra ya sabit qalır, ya da tədricən kiçilə bilir. Kiçik xalazionlar 2-8 həftə ərzində tamamilə sovrula bilər. Bəzi hallarda isə aylarla qala bilər”.

Müalicəsinə gəlincə, Quba Rayon Mərkəzi Xəstəxanasının həkim-oftalmoloqu Kəmalə Bəşirova bildirir ki, müalicə məqsədilə öncə konservativ müalicə (antibakterial damcılar, kortikosteroid tərkibli antibakteriyal mazlar) tətbiq olunur. Konservativ müalicə effektiv olmazsa, nazik iynə vasitəsi ilə xalazionun içinə xüsusi iltihab əleyhinə dərman vurulmaqla xalazionun tədricən sovrulması aparılır. İnyeksiya kifayət etmədikdə cərrahi müdaxilə əsasında xalazion aradan qaldırılır”.

A.İbrahimxəlilova sözlərinə görə, xalazion ciddi təhlükə yaratmasa da, uzunmüddətli narahatlığa səbəb olur:“Erkən mərhələdə həkimə müraciət etmək, həmçinin gigiyena qaydalarına əməl etmək həm müalicədə, həm də profilaktikada mühüm rol oynayır.

Xəstəlik daha çox 20–50 yaş arasındakı şəxslərdə, eyni zamanda kiçik yaşlı uşaqlarda da müşahidə olunur. Xüsusən gözünü tez-tez ovuşduran, allergiyası və ya blefariti olan azyaşlılarda rast gəlinir”.

K.Bəşirova isə deyir ki, ușaqlarda qurd xəstəlikləri, qanazlığı, badamcıqların iltihabı, immun sisteminin zəifləməsi xalazionu yaradan səbəblərdəndir. Böyüklərdə şəkərli diabet, dəri xəstəlikləri, avitaminoz, kosmetik vasitələrin düzgün istifadə edilməməsi xalazionun əmələ gəlməsinə səbəb olur”.

Mütəxəssislər qeyd edir ki, xalazionun əmələ gəlməməsi üçün göz qapaqlarının gigiyenasına diqqət etmək, gözləri ovuşdurmamaq, düzgün qidalanmaq, xroniki blefarit və allergiyanı vaxtında müalicə etmək vacibdir.