Son günlər Azərbaycanda qripəbənzər simptomlarla xəstələnənlərin sayında kəskin artım müşahidə olunur. İnsanlar yüksək hərarət, şiddətli halsızlıq, uzunmüddətli öskürək və bədən ağrılarından şikayət edirlər. Bir çoxları xəstəliyin gedişatının adi mövsümi qripdən fərqləndiyini və uzunmüddətli fəsadlarla müşayiət olunduğunu bildirirlər.

Azmedinfo.az xəbər verir ki, cəmiyyətdə bu vəziyyətin yeni bir xəstəlik və ya növbəti pandemiya olması ilə bağlı narahatlıqlar yaransa da, həkimlər tələsik nəticə çıxarmamağa çağırırlar. Mütəxəssislərin sözlərinə görə, hazırda ölkədə metapnevmovirus aktiv şəkildə yayılır. Bu xəstəlik əvvəlcə uşaqlar arasında geniş qeydə alınır, daha sonra isə böyüklərdə, bir çox hallarda daha ağır formada təzahür edir. Əsas simptomlara yüksək qızdırma, boğaz ağrısı, öskürək, burun axması, baş və əzələ ağrıları, həmçinin kəskin zəiflik daxildir. Bəzi hallarda infeksiya aşağı tənffüs yollarına da təsir göstərir.

Həkimlər vurğulayırlar ki, metapnevmovirus yeni bir virus deyil, lakin yüksək virus yükü və əhalinin bir hissəsinin immunitetinin zəifləməsi səbəbindən xəstəlik daha ağır görünə bilər. Mütəxəssislər qeyd edirlər ki, mövcud qrip əleyhinə vaksinlər immun sistemini dəstəkləməyə kömək edir və xəstəliyin ağır formalarının riskini azaldır.

Profilaktika məqsədilə həkimlər təmiz havada daha çox olmağı, fiziki aktivliyi, yuxu rejiminə riayət etməyi, düzgün qidalanmağı və immuniteti gücləndirməyi tövsiyə edirlər. Qapalı məkanlarda tibbi maska taxmaq, məsafə saxlamaq və təmizlik qaydalarına əməl etmək məsləhətdir.

Xatırladaq ki, respirator infeksiyalar və qrip dünyada ölüm səbəbləri arasında hələ də 8-ci yerdədir. Fəsadlar ən çox immuniteti zəif olanlarda, təkrar xəstələnənlərdə və 65 yaşdan yuxarı şəxslərdə yaranır. Tibbi mütəxəssislər xəbərdarlıq edirlər: profilaktik tədbirlərə etinasızlıq və simptomlara məhəl qoymamaq fəsad riskini artırır. Vəziyyət pisləşdikdə vaxtında tibbi yardım almaq lazımdır, özünümüalicə ilə məşğul olmaq təhlükəlidir.