Günümüzdə süni zəka stomatologiyanın bir çox sahəsində diaqnoz və müalicə planlamasını kökündən dəyişərək həm həkimlərin işini asanlaşdırır, həm də pasiyent məmnuniyyətini artırır.

Azmedinfo.az "TRT Haber"ə istinadən yazır ki, Mərmərə Universiteti Stomatologiya Fakültəsində aktiv tətbiq olunan bu texnologiya, xüsusilə gülüş dizaynında pasiyentin üz quruluşuna ən uyğun diş formasını işə başlamazdan əvvəl rəqəmsal olaraq təqdim etməyə imkan verir. Rəqəmsal ölçü götürmə sistemləri sayəsində ənənəvi üsullardakı ürəkbulanma refleksi aradan qalxır və müalicə müddəti əhəmiyyətli dərəcədə qısalır.

Uşaq stomatologiyasında da süni zəka böyük üstünlüklər yaradır. Uşaqların keçmiş müalicə təcrübələri və gigiyena vərdişləri təhlil edilərək onlara özəl qoruyucu müalicə planları hazırlanır. Bundan əlavə, ortodontik müalicələrdə dişlərin gələcəkdəki vəziyyəti öncədən proqnozlaşdırılır ki, bu da müalicənin nəticəsini daha etibarlı edir. Beləliklə, süni zəka dəstəyi ilə diş müalicələri artıq daha sürətli, konfortlu və proqnozlaşdırıla bilən şəkildə həyata keçirilir.